शहरी विकास मन्त्री रामकुमारी झाँक्रीले व्यवस्थित शहरीकरण सहितको योजना तर्जमा गर्नुपर्नेमा जोड दिनुभएको छ । रुपन्देहीको तिलोत्तमामा आयोजित राष्ट्रिय शहरी नीति र शहरी विकास ऐन तर्जमा सम्बन्धी एक दिवसीय प्रादेशिक कार्याशालालाई मंगलवार सम्बोधन गर्दै मन्त्री झाँक्रीले स्थानीय तथा प्रदेश सरकारले ऐन तर्जुमा गर्दा व्यवस्थित शहरको योजनालाई आत्मसात गर्ने गरी ऐन बनाउनुपर्ने बताउनुभयो । उहाँले कुनै पनि योजनाका डिपिआर तयार गर्दा बस्तुगत रुपमा तयार भएका छन् वा छैनन् समीक्षा गर्नुपर्नेमा उहाँको जोड छ ।
विकास निरन्तर प्रकृया भएको उल्लेख गर्दै मन्त्री झाँक्रीले योजनाबद्ध विकासलाई राज्य संचालन गर्ने संयन्त्रले हुवहु अवलम्बन गर्नुपर्ने बताउनुभयो । उहाँले समयको माग अनुरुप विकासलाई बस्ती भएको स्थानमा केन्द्रित गर्नुपर्ने बताउनुभयो । कार्यशालामा विभिन्न विषयमा कार्यपत्रहरु समेत प्रस्तुत भएका थिए ।
बाँकेमा स्थापना गर्ने भनिएको विश्वविद्यालय कपिलवस्तुमा सार्ने निर्णयमा पुन विचार गर्नुपर्ने माग सहित मुख्यमन्त्री कुलप्रसाद केसीलाई ज्ञापनपत्र बुझाइएको छ । पूर्वमन्त्री आरती पौडेलसहितको टोलीले मंगलबार कपिलवस्तुमा एक कार्यक्रमका बीच ज्ञापन पत्र बुझाएको हो । लुम्बिनी प्रदेशसभाबाट समेत अनुमोदन गरि सरकारको नीति कार्यक्रम बनेको प्रदेश विश्वविद्यालय बाँकेको खजुराबाट अन्यत्र सार्ने निर्णय सच्याउन माग गर्ने ध्यानाकर्षण पत्रसहित बाँकेबाट बुटवल आएका समूहले कपिलवस्तु पुगेर ज्ञापनपत्र बुझाएको छ । यसअघि मुख्यमन्त्रीलाई सोमबार नै टेलिफोन मार्फत समय माग गरेर भेट्ने सहमति गरे पनि भेट्नलाई बुटवल आएपछि भने आफूहरुलाई बेवास्ता गरिएको भन्दै पत्रकार सम्मेलन समेत गरिएको थियो । पूर्ववर्ति सरकारको नीति तथा कार्यक्रममा परेको प्रदेश विश्वविद्यालय खजुरामा स्थापना गर्ने निर्णय विरुद्ध मुख्यमन्त्री केसी र प्रदेश योजना आयोगका उपाध्यक्ष बामदेव क्षेत्रीको योजनामा खजुराबाट अन्यत्र सार्ने योजना सार्वजनिक भएसँगै बाँकेमा आन्दोलनको तयारी गरिएको पौडेलले बताउनुभयो । निर्णय सच्याउन माग गर्दै बाँके जिल्ला समन्वय समितिका संयोजक अजय श्रीवास्तव, खजुरा गाउँपालिका अध्यक्ष किस्मत कुमार कक्षपती लगायका प्रतिनिधिहरु बुटवल आउनुभएको थियो ।