तिलोत्तमा, ६ पुस ।
तिलोत्तमा चेम्बर अफ कमर्शको १० औं वार्षिक साधारण सभा तथा चौथो अधिवेशनका अवसरमा आज रक्तदान कार्यक्रम सम्पन्न भएको छ ।रक्तदान जिवन दान भन्ने मुल नाराका साथ संघले १० औं वार्षिक साधारण सभा तथा चौथो अधिवेशनका अवसरमा रक्तदान कार्यक्रम आयोजना गरेकोे हो ।
मणिग्राममा आयोजित रक्तदान कार्यक्रममा व्यवसायीहरुले उत्साहजनक सहभागिता जनाएको संघका अध्यक्ष बाबुलाल भुसालले जानकारी दिनु भयो। रक्तदान कार्यक्रममाबोल्दै नेपाल चेम्बर अफ कमर्शका केन्द्रीय सदस्य एवं लुम्बिनी प्रदेश अध्यक्ष टंकप्रसाद पोखरेलले मानवीय जीवनका लागि रगत अत्यन्तै महत्वपूर्ण भएको बताउनु भएको थियो ।
उहाले व्यवसायीहरुको हक हित र उनीहरुका मुद्दालाई बोकेर संघको नेतृत्व अगाडि बढेमा संस्था मजबुत हुने भन्दै नेतृत्व र क्षमता विकासका कार्ययोजनाहरु पनि सञ्चालन गर्नुपर्नेमा जोड दिनु भयो । चेम्वर अफ कमर्श लुम्बिनी प्रदेशका महासचिव एवं संघका संस्थापक अध्यक्ष झविन्द्रप्रसाद कंडेलले सही कार्ययोजना र नेतृत्वले मात्र संस्थाको सवलीकरण र विकासमा टेवा पुग्ने बताउनु भयो।
कार्यक्रममा संघका उपाध्यक्ष नेत्रप्रसाद न्यौपाने, महासचिव विष्णु बराल क्षेत्रीले पनि आ–आफ्नो धारणा राख्नु भएको थियो। रक्तदान कार्यक्रममा ४१ युनिट रगत संकलन भएको संघका कार्यालय प्रमुख रामु सापकोटाले जानकारी दिनु भयो । तिलोत्तमा चेम्बर अफ कमर्शको १० औं वार्षिक साधारण सभा तथा चौथो अधिवेशन यही पुस १४ गते हुँदैछ ।
