चलचित्र पत्रकार संघ नेपाल रुपन्देहीको सातौँ साधारण सभा तथा चौथो अधिवेशनबाट कृष्ण भण्डारी सर्वसम्मत रूपमा अध्यक्षमा निर्वाचित भएका छन्। अधिवेशनले भण्डारीको नेतृत्वमा नयाँ कार्यसमिति चयन गरेको हो।नवनिर्वाचित कार्यसमितिको उपाध्यक्षमा कल्पना डुम्रे, सचिवमा प्रकाश पाण्डे, सह–सचिवमा राजिव भुसाल र कोषाध्यक्षमा मनोज क्षेत्री चयन भएका छन्। त्यसैगरी सदस्यहरूमा हरिलाल बस्याल, रमेश पराजुली, कल्पना घिमिरे, शारदा शाही, यमुना जिसी, सुदिप गौतम, निर्मल थापा र सागर भण्डारी रहेका छन्।नवनिर्वाचित पदाधिकारी तथा सदस्यहरूलाई मंगलबार नै प्रमाणपत्र वितरण गर्दै सपथ ग्रहण गराइएको थियो।कार्यक्रममा बोल्दै चलचित्र पत्रकार संघ नेपालका अध्यक्ष समिर बलामीले चैत १० गतेभित्र जिल्ला तथा प्रदेश अधिवेशन सम्पन्न गर्ने तथा बैशाख ५ गते केन्द्रीय अधिवेशन गर्ने तयारी भइरहेको जानकारी दिए। उनले चलचित्र पत्रकारहरूको हकहित संरक्षण, पेशागत विकास तथा नेपाली चलचित्रको प्रवर्द्धन संघको प्रमुख लक्ष्य रहेको उल्लेख गरे।उनले पत्रकारहरूको क्षमता अभिवृद्धिका लागि तालिम तथा विभिन्न कार्यक्रमहरू सञ्चालन गरिने तथा आवश्यकताअनुसार केन्द्रबाट सहयोग उपलब्ध गराइने पनि बताए।कार्यक्रममा नेपाल पत्रकार महासंघ रुपन्देहीका उपाध्यक्ष विश्वास ढकाल, नेपाल प्रेस युनियन रुपन्देहीका अध्यक्ष कविन्द्र नेपाल लगायतले शुभकामना मन्तव्य व्यक्त गरेका थिए।सो अवसरमा संघका अध्यक्ष मोहन न्यौपानेले वार्षिक प्रतिवेदन प्रस्तुत गरेका थिए भने कोषाध्यक्ष राजिव भुसालले आर्थिक प्रतिवेदन प्रस्तुत गरेका थिए।वक्ताहरूले बुटवल लुम्बिनी प्रदेशको प्रमुख व्यावसायिक केन्द्रका रूपमा विकास भइरहेको सन्दर्भमा यहाँ रहेका चलचित्र हलहरूमा दर्शक आकर्षित गर्न पत्रकारहरूले सकारात्मक भूमिका खेल्नुपर्नेमा जोड दिएका थिए।