रुपन्देही जिल्ला — सियारी गाउँपालिकाका अध्यक्ष तथा नेपाली कांग्रेस रुपन्देही जिल्ला कार्यसमितिका उपसभापति थानेश्वर घिमिरे ले आफ्नो पदबाट राजीनामा दिएका छन्।
घिमिरेले जिल्ला सभापतिलाई सम्बोधन गर्दै औपचारिक रूपमा राजीनामापत्र पेश गरेका हुन्।
राजीनामापत्रमा उनले २०७९ सालमा सम्पन्न प्रतिनिधि सभा निर्वाचनमा रुपन्देहीका पाँचवटै निर्वाचन क्षेत्रमा पार्टीले सफलता हासिल गर्न नसकेको अवस्थालाई उल्लेख गर्दै त्यसको नैतिक जिम्मेवारी लिँदै उपसभापति पदबाट राजीनामा दिएको बताएका छन्।
उनले पार्टीले आफूलाई दिएको जिम्मेवारीका लागि धन्यवाद व्यक्त गर्दै आगामी दिनमा पनि पार्टीको सिद्धान्त, नीति र कार्यक्रमप्रति प्रतिबद्ध रहँदै सक्रिय सदस्यका रूपमा संगठनलाई सुदृढ बनाउन निरन्तर लागिरहने उल्लेख गरेका छन्।
घिमिरेले जिल्ला कार्यसमितिलाई आफ्नो राजीनामा स्वीकृत गरिदिन आग्रह गरेका छन्। राजीनामापत्रमा मिति २०८२ माघ २३ उल्लेख गरिएको छ।
