काठमाडौँ । नेकपा एमालेका महासचिव शंकर पोखरेलले राष्ट्रिय स्वतन्त्र पार्टी (रास्वपा) ले आफूलाई संघीयता विरोधी शक्तिका रूपमा उभ्याएको आरोप लगाएका छन्।
सामाजिक सञ्जालमार्फत प्रतिक्रिया दिँदै पोखरेलले चुनावका बेला एउटा वाचा गर्ने र सत्तामा पुगेपछि त्यसको ठीक विपरीत गतिविधि अघि बढाउने प्रवृत्तिले समाजमा नयाँ राजनीतिक द्वन्द्वको बीउ रोप्न सक्ने भन्दै सचेत रहन आग्रह गरेका छन्।
पोखरेलले लेखेका छन्, “चुनावका बेला ‘प्रदेश र स्थानीय तहलाई थप बलियो बनाउने’ दाबी गरेर जनताको मत जितेको राष्ट्रिय स्वतन्त्र पार्टीले आफ्नो राष्ट्रिय महाधिवेशनमार्फत संघीयताकै विरुद्धमा आफूलाई उभ्याउने काम गरेको छ। चुनावमा एउटा वाचा गर्ने र सत्तामा पुगेपछि ठीक विपरीत क्रियाकलाप अघि बढाउने सत्तारुढ दलको यो चरित्रले समाजमा नयाँ राजनीतिक द्वन्द्वको बीउ नरोपोस् भन्ने कुरामा सबै सचेत हुन जरुरी छ।”
उनले संघीयता आदिवासी जनजाति, मधेसी, दलित, अल्पसंख्यक समुदाय तथा पिछडिएका क्षेत्रका नागरिकहरूको दशकौँ लामो संघर्ष र आकांक्षाको परिणाम भएको उल्लेख गर्दै ऐतिहासिक संविधानसभाले त्यसलाई संस्थागत गरेको बताए।
साथै, निर्वाचनका क्रममा गरिएका प्रतिबद्धताविपरीतका गतिविधिविरुद्ध एकजुट भएर खबरदारी गर्न पनि उनले आह्वान गरेका छन्।
रास्वपाको महाधिवेशनको बन्दसत्रमा उपसभापति डा. स्वर्णिम वाग्लेले प्रस्तुत गरेको राजनीतिक दस्तावेजमा हालको प्रदेश संरचना खारेज गरी स्थानीय तहका प्रमुखहरू सम्मिलित प्रदेश काउन्सिल गठन गर्नुपर्ने प्रस्ताव समेटिएपछि राजनीतिक वृत्तमा बहस र तरंग उत्पन्न भएको छ।
