मैत्रीपूर्ण खेलमा नेपालले भारतलाई पेनाल्टी सुटआउटमा ३-० गोलले पराजित गरेको छ। सिक्किमको पाल्जोर रङ्गशालामा भएको खेलमा दुवै टोलीले पहिलो हाफमा १-१ गोलको बराबरी खेलेका थिए। दोस्रो हाफमा नेपाल र भारत दुवै टोलीले गोल गर्न सकेनन्।
खेलको निर्धारित ९० मिनेटसम्म नेपालको पोस्ट उषा नाथले सम्हालेकी थिइन्। खेल बराबरीमा जाने भएपछि नेपालका प्रशिक्षक नवीन न्यौपानेले नेपाली टोलीकी पेनाल्टी स्पेसलिस्ट भनेर चिनिने अन्जना राना मगरलाई मैदानमा उतारे। उनलाई मैदानमा उतारे बमोजिम नै उनले प्रदर्शन देखाइन्। उनले भारतको दुई पेनाल्टी रोक्दै नेपालको जित सुनिश्चित गरिन्।
नेपालको लागि पेनाल्टी सुटआउटमा सविता राना मगर, रश्मी कुमारी घिसिङ र निशा थोकरले गोल गरे। अनिता बस्नेतले भने पोस्ट बाहिर प्रहार गरिन्। पहिलो र दोस्रो पेनाल्टी गोल हुँदा तेस्रो क्रममा आएकी अनिताले पोस्ट बाहिर प्रहार गरेकी थिइन्। जसको कारण नेपालले चौथो पेनाल्टीसम्म कुर्नुपर्यो। चौथो पेनाल्टीमा निशा थोकरले गोल गर्दै नेपालको जित सुनिश्चित गरिन्।
भारतको तर्फबाट प्रियादर्शनीले पहिलो पेनाल्टी सुटआउट प्रहार गरेकी थिइन्, उनलाई नेपालकी गोलकिपर अन्जना राना मगरले रोकिन्।
दोस्रो पेनाल्टी सुट आउट सन्तोषले हानेकी थिइन्। उनले पोस्ट माथि प्रहार गरिन्। तेस्रो भने अष्टम ओरमले प्रहार गरेको पेनाल्टी सुटआउट अन्जनाले सहजै नियन्त्रणमा लिइन्। खेलको ३०औं मिनेटमा भारतका लागि सोमिया गुगलोथले दुईजना डिफेन्डर र गोलकिपरलाई बिट गर्दै भारतका लागि गोल गरेकी थिइन्। उनको गोलसँगै भारतले १-०को अग्रता बनाएको थियो।
पहिलो हाफको थप गरिएको दोस्रो मिनेटमा नेपालका लागि रश्मीकुमारीगी सिंहले गोल गर्दै नेपाललाई एक-एक बराबरीको स्थितिमा ल्याइन्। अनिता बस्नेतले हानेको कर्नरमा हल्का हेडर गर्दै रश्मीले गोल गरेकी हुन्।
७१औं मिनेटमा भारतले सुनौलो अवसर बनाएको थियो। तीनजना डिफेन्डरलाई बिट गर्दै हानेको प्रहार गोलकिपर उषानाथले पन्च गर्दै बाहिर फ्याँकिदिइन्। खेलको ७९औं मिनेटमा सविता राना मगरले राम्रो अवसर गुमाइन्। नेपालका लागि दिइएको अग्रता बनाउने राम्रो अवसर थियो। नेपालले यसअघि त्रिदेशीय श्रृङ्खलामा पनि भारतलाई २-१ ले पराजित गरेको थियो।
