सरिता थारु, कपिलबस्तु ।
बाणगंगा नगरपालिकामा आयोजना गरिएको ७औँ नगरस्तरीय माघी तथा खिचडी महोत्सवको अवसरमा रक्तदान कार्यक्रम सफलतापूर्वक सम्पन्न भएको छ। कार्यक्रममा ५४ पिन्ट रगत संकलन भएको ७औँ नगरस्तरीय माघी खिचडी महोत्सव मूल समारोह समिति संयोजक ऋषिराम थारुले जानकारी दिनुभयो। थारु कल्याणकारिणी सभा बाणगंगा नगरकार्यसमितिको आयोजना तथा नेपाल रेडक्रस सोसाइटी बाणगंगा नगरपालिका शाखा, सिद्धिपरको प्राविधिक सहयोगमा रक्तदान कार्यक्रम सम्पन्न गरिएको हो। माघी महोत्सवलाई केवल सांस्कृतिक उत्सवमा सीमित नराखी सामाजिक उत्तरदायित्वसँग जोड्दै आएको नगर उपसभापति तथा आर्थिक व्यवस्थापन समिति संयोजक दशरथ थारुले बताउनुभयो। उहाँका अनुसार विगतका वर्षहरूझैँ यस वर्ष पनि माघी महोत्सवसँगै विभिन्न सामाजिक कार्यहरू गरिँदै आएको छ।
महोत्सवकै अवसरमा एसईई तथा प्लस टु परीक्षामा उत्कृष्ट नतिजा हासिल गर्ने थारु समुदायका विद्यार्थी र नेपाल सरकारबाट अवकाश प्राप्त कर्मचारीहरूलाई सम्मान गर्ने कार्यक्रम समेत रहेको उहाँले जानकारी दिनुभयो। महोत्सवमा थारु सांस्कृतिक झाँकी र्याली, विविध सांस्कृतिक प्रस्तुति, थारु परिकारको प्रदर्शनी तथा बिक्री, थारु सीप र हस्तकलाको प्रदर्शन लगायतका कार्यक्रमहरू समावेश छन्।
साथै झुमरा, झर्रा, लाठी नाच, मयूर नाच, सजनी–विरहनी गीत तथा रेकर्ड डान्स जस्ता थारु संस्कृतिलाई झल्काउने आकर्षक नृत्य तथा सांस्कृतिक प्रस्तुतिहरूले दर्शकलाई मन्त्रमुग्ध बनाइरहेका छन्। धनकौलीको पूर्वी साइड लखनपारामा आयोजना भइरहेको माघी महोत्सव यही माघ २ गतेदेखि सञ्चालनमा आएको हो। माघी मेला माघ ४ गतेसम्म सञ्चालन हुने आयोजकले जनाएको छ।
