चन्द्रौटा । कपिलवस्तुको विजयनगर गाउँपालिकामा नेकपा एमालेबाट निर्वाचित दुई जनप्रतिनिधिले पार्टी परित्याग गर्दै राष्ट्रिय स्वतन्त्र पार्टी (रास्वपा) रोजेका छन्।
एमालेबाट दुई पटक विजयनगर गाउँपालिकाको उपाध्यक्षमा निर्वाचित लक्ष्मी कुमारी चौधरी र वडा नम्बर–५ का वडा अध्यक्ष अनवर मोहम्मद मुसलमानले भदौ ५ गते रास्वपाको सदस्यता लिएका हुन्।
चौधरी एमाले कपिलवस्तु जिल्ला कमिटी सदस्य तथा अखिल नेपाल महिला संघ कपिलवस्तुकी जिल्ला उपाध्यक्ष समेत थिइन्। स्थानीय तहको निर्वाचनमा एमालेबाट लगातार दुई पटक उपाध्यक्षमा निर्वाचित चौधरीको रास्वपा प्रवेशलाई विजयनगरको स्थानीय राजनीतिमा अर्थपूर्ण रूपमा हेरिएको छ।
त्यस्तै, वडा नम्बर–५ का अध्यक्ष मुसलमान पनि एमालेबाट निर्वाचित जनप्रतिनिधि हुन्। उनी नेपाल मुस्लिम इत्तेहाद संगठन लुम्बिनी प्रदेशका उपाध्यक्षसमेत रहँदै आएका थिए।
दुवै जनप्रतिनिधिले एमालेबाट निर्वाचित भएर स्थानीय तहको जिम्मेवारी सम्हालिरहेका बेला रास्वपामा प्रवेश गरेका हुन्। उनीहरूको पार्टी परिवर्तनसँगै विजयनगरको स्थानीय राजनीतिक समीकरणमा समेत नयाँ बहस सुरु भएको छ।
