लुदअ बैशाख २२, महोत्तरी
महोत्तरीमा १२ जनामध्ये ११ जनाको घरेलु जाँडरक्सी खाएर ज्यान गएको मेडिकल रिपोर्टले देखाएको छ ।
भंगहाका पलट साह, नथुनी महरा, लालवावु सिंह, सिकिन्द्र सिंह, सुकदेव महरा, रौतहट घर भई भंगहामा काठ मिस्त्रीको काम गर्दै आएका महेन्द्र चौधरी र मोहन चौधरीको जाँडरक्सी खाएर ज्यान गएको जिल्ला जनस्वास्थ्य कार्यालय महोत्तरीले जनाएको छ ।
त्यस्तै बर्दिवास नगरपालिका १२ का गंगाराम सदा, सोकिन्द्र मण्डल, सोमनीदेवी वातर र भारत उत्तर प्रदेश घर भइ इँटा भट्टामा काम गर्ने मोतीलाल प्रजापतिको पनि जाँडरक्सी खाएर ज्यान गएको रिपोर्टले देखाएको जनस्वास्थ्य निरीक्षक गिरेन्द्र कुमार झाले जानकारी दिए ।
आइतबार ज्यान गुमाएका रुप नारायण सिंह दनुवारको भने मलेरियाका कारण ज्यान गएको पनि जनस्वास्थ्य निरीक्षक झाले बताए । शुक्रराज ट्रपिकल एवं सरुवा रोग अस्पताल टेकु, बीपी कोइराला स्वास्थ्य विज्ञान प्रतिष्ठान धरान र विश्व स्वास्थ्य संगठनको टोलीले अनुसन्धान गरी ज्यान गएको कारण पुष्टि गरेको हो ।
यसैबीच प्रदेश २ का आन्तरिक मामिला तथा कानुनमन्त्री ज्ञानेन्द्र कुमार यादवले ज्यान गुमाउनेका छोराछोरीलाई पढ्न राहत पुग्नेगरी सहयोग रकम उपलब्ध गराउने बताएका छन् ।
