लुदअ २८ बैशाख, काठमाडौं
नेपाल कम्युनिष्ट पार्टी (नेकपा) का अध्यक्ष पुष्पकमल दाहालले नेपाली भूमि लिपुलेक हुँदै मानसरोवर जाने सडक उद्घाटन गर्ने भारतीय कदम त्रिदेशीय मुद्दा भएकाले नेपाल, भारत र चीनबीच कुटनीतिक वार्ता गर्नुपर्ने बताएका छन् ।
राज्य व्यवस्था तथा सुशासन समितिको आजको बैठकमा अध्यक्ष दाहालले यो त्रिदेशीय समस्या भएकाले भारतसँग मात्रै नभइ चीनसँग पनि कुटनीतिक वार्ता गर्नुपर्ने बताएका हुन् ।
उनले नेपाली भूमिमा चीन र भारतको सहमतिबाट व्यापारिक उद्देश्यले सडक खुलाइएको बताए ।
अध्यक्ष दाहालले यो विषयका बारेमा आफूले प्रधानमन्त्री केपी ओलीलाई भेटी छलफल गरिसकेको र यसलाई गम्भीरताका साथ उठाउन पनि पहल गरिरहेको जानकारी दिए ।
यस्तै गृहमन्त्री रामबहादुर थापाले भारतले नेपालको भूभाग अतिक्रमण गरेको विषयलाई कूटनीतिक तहबाट समाधान गर्नुपर्ने बताए ।
गृहमन्त्री थापाले झण्डै ४ सय वर्ग किलोमिटर नेपाली भूमि भारतले अतिक्रमण गरेको भन्दै कूटनीतिक तहबाट यसको समाधान खोजिनुपर्ने बताए ।
मानसरोवर जाने सडकको विषयमा पनि सरकारले विरोध जनाइसकेको गृहमन्त्री थापाले जानकारी दिए ।
बैठकमा केही सदस्यहरुले सीमा विवादको विषय अन्तर्राष्ट्रिय अदालतमा लैजानुपर्ने बताएका थिए ।
उनीहरुले भारतले सडक निर्माण गरेर उद्घाटन गर्ने बेलामा मात्र सरकारले थाहा पाउनु दुखद भएको टिप्पणी गरे ।
