हरि आचार्य अर्घाखाँची, जेठ ३
अर्घाखाँचीको शितगंगा नगरपालिका वडा नं. १३ को वडाकार्यालयले लकडाउनलाई अझ कडाईका साथ लागु गर्ने निर्णय गरेको छ । वडास्तरीय विपत व्यवस्थापन समितिको बैठकले यस्तो निर्णय गरेको हो ।
वडा अध्यक्ष दुर्गा बहादुर बिसीको अध्यक्षतामा बसेको बैठकले वडालाई पूर्ण रुपमा रोक लगाउने निर्णय गरेको बताईएको छ ।
वडाले कोरोना भाइरस रोकथामका लागि सचेतना फैलाउन र लकडाउन कार्यान्वयन गर्न गराउन सामाजिक दुरी कायम गरी वडामा प्रवेश गर्ने सबै नाकामा पालैपालो गाँउका युवा समूह परिचालन गर्ने निर्णय गरेको वडा अध्यक्ष जानकारी दिए । छिमेकी जिल्लाहरुमा कोरोनाको संक्रमण बढ्दै गएका कारणले वडालाई पूर्ण रुपमा बन्द गर्ने निर्णय गरेको उनले बताए ।
वडा नं. १३ को बिपत ब्यबस्थापन समितिको बैठकले वडा भित्र रहेका बिद्यालयहरुलाइ क्वारेन्टाइनको रुपमा प्रयोग गर्ने, स्वास्थ्यचौकी बाहेका कार्यलय हरु बन्द गर्ने, अत्यावश्यक सामाग्रीका पसल, खाद्यान्न तथा किराना बिहान ७ देखि बिहान ९ बजेसम्म निश्चित मापदण्ड प्रयोग गरि खोल्ने र अन्य पसल पुर्ण रुपमा बन्द गर्ने निर्णय गरेको छ ।
त्यस्तै अत्यावश्यक सवारि साधन एम्बुलेन्स, प्रहरी भ्यान विद्युत सवारी बाहेक पुर्ण प्रतिबन्ध लगाउने, सुरक्षाकर्मीको साथमा स्वमसेवक युवा परिचालन गर्ने, अन्यत्रबाट आउन पुर्ण रुपमा बन्द गर्ने यदि लुकिछिपी आएमा अनिवार्य रुपमा तोकिएको क्वारेन्टाइन मा बस्नु पर्ने, भारत तथा तेस्रो मुलुकमा रहेका नागरिकको तथ्यांक संकलन गर्ने, अन्य वडा, नपा जिल्लामा तथा तेस्रो मुलुक बाट कोहि परिवारको सदस्य आउदै गरेको भए अनिवार्य वडा तथा नगरपालिका लाई जानकारी दिनुपर्ने यदि आएको सुचना नदिइ घरमा राखेको पाइएमा आफ्नै खर्चमा सबै परिवार क्वारेन्टाइनमा बस्नुपर्ने पनि निर्णय गरिएको वडाअध्यक्ष विसिले बताए ।
अत्यावश्यक काम बाहेक एकघर बाट अर्को घरमा नजाने यदि जानै परे ३ फुटको सामाजिक दुरि कायम राख्ने, मेलापातको कामगर्दा ४ जना भन्दा बढी खेतला नलगाउने र काम गर्दा एकअर्का बिच भौतिक दुरि कायम राखी गर्ने लगायतका निर्णय गरिएको छ । यदि यी निर्णय तथा सूचनाको पालना नगरेको पाईएमा नियम अनुसार कारवाही गरिने वडाकार्यालयले जनाएको छ ।
