लुदस, काठमाण्डौं ।
राष्ट्रिय संगीतकर्मी संघका अध्यक्ष राजेन्द्र कुमार कार्कीको अगुवाईमा आज अभियानको १७ औं दिन राहत तथा सहयोग बितरण गरिएको छ । आज जोरपाटी, बानेश्वर ,तिनकुने, कोटेश्वर र ललितपुर लगायतका क्षेत्रमा रात्री कालिन दोहोरी व्यवसायमा काम गर्ने कलाकार लगाएत अन्य क्षेत्रमा मजदुरी गर्ने करिव ६० घरपरिवारलाई राहत बितरण गरिएको हामी नेपाली ग्लोबलका अध्यक्ष अमृत लामाले बताएका छन् ।
सामाजिक सेवा भावले ओतप्रोत हामी नेपाली ग्लोवल नामक अन्तराष्ट्रिय संस्था र कलाकर्मीहरुको छाता संगठन राष्ट्रिय संगीतकर्मी संघले बिगत १६ दिन देखी निरन्तर रुपमा राहत तथा सहयोगका माध्यमबाट मानव सेवामा सक्रिय भैरहेको छ
अहिले विश्व महामारीका रुपमा रहेको कोरोना भाइरस (कोभिड १९) को दोस्रो भेरियन्टको संक्रमण बढ्दै गएकाले नेपाल सरकारले जारी गरेको लक डाउन (निशेधाज्ञा)का कारण आम नागरिकहरु समस्यामा परेका छन् ।
अभियानका क्रममा सुरक्षाकर्मी, स्वास्थ्यकर्मी, अभियानकर्मीलाई स्वास्थ्य सामाग्री बितरण देखी लिएर लकडाउनका कारण समस्यामा परेका कलाकार, बेसाहारा, असहाय ,जेष्ठ नागरिक लगायत आम सर्वसाधारणलाई खाना खुवाउने देखी लिएर दाल, चामल,तेल,नुन लगायतका खाद्यान्न सामाग्री सहयोग गर्दे आएको छ ।
आजको कार्यक्रममा राष्ट्रिय संगीतकर्मी संघका अध्यक्ष राजेन्द्र कुमार कार्की, हामी नेपाली ग्लोवलका अध्यक्ष तथा नायक अमृत लामा , राष्ट्रिय संगीतकर्मी संघका महासचिव तथा विपत व्यवस्थापन समितिका संयोजक बिक्रम जंग शाह,राष्ट्रिय संगीतकर्मी संघ ललितपुरका सचिव सुवास बजगाई र मनोज सापकोटा लगायतको उपस्थिती रहेको थियो ।
