लुदअ भदौ ९, काठमाण्डौ
नेकपा (एकीकृत समाजवादी) का अध्यक्ष माधवकुमार नेपालले राष्ट्रपति विद्यादेवी भण्डारीले सैनिक अधिकारीहरूसँग भेट गर्नुले शङ्का जन्माएको बताउनुभएको छ ।
आज बिहीवार पार्टी पुनर्गठन दिवसको अवसरमा काठमाण्डौमा आयोजित कार्यक्रमलाई सम्बोधन गर्दै अध्यक्ष नेपालले राष्ट्रपति विद्यादेवी भण्डारीले नेपाली सेनाका अधिकारीहरूलाई निवासमा बोलाएर डिनर गराउनुले शङ्का जन्माएको बताउनुभएको हो । उहाँले कुनै अनिष्ट हुने हो कि भन्ने प्रश्न उठेको बताउनुभयो । उहाँले भन्नुभयो, ‘राष्ट्रपतिले सेनाका पूर्व अधिकारीरूलाई निवासमा बोलाएर डिनर गराउनुले शङ्का जन्माएको छ । के गर्न खोजेका छन् राष्ट्रपतिले रु भन्ने प्रश्न खडा भएको छ । भोलि कतै अनिष्ट त हुने होइन रु भन्ने प्रश्न पनि खडा भएको छ ।’
अध्यक्ष नेपालले राष्ट्रपति र नेपाली सेनाका अधिकारीहरूको बीचमा भएको भेटवार्ताको सम्बन्धमा गठबन्धनमा छलफल भएको पनि बताउनुभयो । नेपाली राजनीतिमा प्रतिगामी र राजतन्त्रवादीलगायतका शक्तिहरूको क्रियाशिलताको सम्बन्धमा पनि आफूहरूको नजर पुगिरहेको उहाँको भनाइ थियो ।
कार्यक्रममा बोल्दै अध्यक्ष नेपालले गएको पालिका चुनावमा आएको नतिजाप्रति गौरवबोध गर्नुपर्ने बताउनुभयो । उहाँले २७ प्रतिशत उम्मेदवार उठाउँदा नौ लाखभन्दा बढी भोट पाएको उल्लेख गर्दै सबै ठाउँमा उम्मेदवार उठाएको भए २० लाख भोट पाउने दाबी गर्नुभयो । उहाँले २० लाख भोट पाए पार्टीको २० सिटलाई कसैले रोक्न नसक्ने बताउनुभयो । उहाँले आउँदो चुनावमा समानुपातिक मतले पार्टीको हैसियत देखाउने भएकाले पार्टीको चुनाव चिह्न प्रचारप्रसारमा लाग्न कार्यकर्तालाई निर्देशन पनि दिनुभयो ।
अध्यक्ष नेपालले सबै पालिकामा पार्टीको सङ्गठन निर्माण गर्न र सङ्गठनलाई चलायमान बनाउन निर्देशन दिनुभयो । त्यस्तै पार्टी सङ्गठन र सदस्यहरूको अभिलेखीकरण गर्नुपर्नेमा उहाँले जोड दिनुभयो ।
