तौलिहवा । नेकपा (एमाले) कपिलवस्तुले भोटेकोशी बाढीपीडितलाई सहयोग गर्ने, पार्टी सदस्यता नवीकरणलाई प्रभावकारी बनाउने तथा संविधान दिवसलाई विशेष कार्यक्रमसहित मनाउने निर्णय गरेको छ।
तौलिहवामा सम्पन्न पार्टी जिल्ला सचिवालयको १३औँ बैठकले संगठन सुदृढीकरणसँगै पछिल्लो समय सञ्चालन गरिएको पार्टी जागरण अभियानको समीक्षा गर्दै विभिन्न निर्णय गरेको हो।
बैठकले विजयनगर गाउँपालिकाकी उपाध्यक्ष लक्ष्मी कुमारी चौधरी र वडा नम्बर ५ का अध्यक्ष अनवर मोहम्मद मुसलमानलाई पार्टीबाट कारबाही गर्न तथा उनीहरूलाई जनप्रतिनिधिको जिम्मेवारीबाट समेत मुक्त गर्न पार्टी केन्द्रमा सिफारिस गर्ने निर्णय गरेको जिल्ला अध्यक्ष बाबुराम खनालले जानकारी दिएका छ्न ।
बैठकले भोटेकोशी क्षेत्रमा आएको बाढी तथा प्राकृतिक विपत्तिबाट प्रभावित नागरिकलाई पार्टीका तर्फबाट सहयोग गर्ने निर्णय गरेको छ। विपत्तिमा परेका नागरिकलाई राहत तथा सहयोग उपलब्ध गराउनु सामाजिक दायित्व भएको भन्दै आवश्यक पहल अघि बढाउने विषयमा बैठकमा छलफल भएको जनाइएको छ।
एमाले कपिलवस्तुले पार्टी सदस्यता नवीकरणलाई व्यवस्थित र प्रभावकारी बनाउने विषयलाई समेत प्राथमिकतामा राखेको छ। संगठनलाई थप सक्रिय र व्यवस्थित बनाउँदै पार्टी गतिविधिलाई प्रभावकारी रूपमा अघि बढाउने विषयमा बैठकमा छलफल भएको थियो।
त्यस्तै, असोज ३ गते मनाइने संविधान दिवसलाई भव्य रूपमा मनाउने निर्णय गरिएको छ। संविधान दिवसका अवसरमा विभिन्न कार्यक्रम सञ्चालन गर्दै संविधानको महत्व, लोकतान्त्रिक मूल्य–मान्यता तथा नागरिक अधिकारका विषयमा जनचेतना अभिवृद्धि गर्ने एमालेले जनाएको छ।
बैठकमा एमाले केन्द्रीय सदस्य गिरधारीलाल न्यौपाने, पूर्व पोलिटब्युरो सदस्य बिमला घिमिरे, केन्द्रीय निर्वाचन आयोगका सदस्य झविलाल पोखरेल तथा लुम्बिनी प्रदेश कमिटी सचिवालय सदस्य डम्बर शर्मालगायतले धारणा राखेका थिए ।
जिल्ला अध्यक्ष बाबुराम खनालको अध्यक्षता, उपाध्यक्ष शंकर पाण्डेको स्वागत मन्तव्य तथा जिल्ला सचिव सिवी गहतराजको सञ्चालनमा बैठक सम्पन्न भएको थियो। बैठकमा प्रदेश कमिटी सदस्यहरू खुमप्रसाद आचार्य, बाबुराम आचार्य र गोपाल थापा लगायतको उपस्थिति रहेको एमाले कपिलवस्तुले जनाएको छ।
