काठमाडौं । नेपाली कांग्रेसको १५औँ महाधिवेशनमा ताप्लेजुङका युवा नेता गौरव भण्डारीले ३५ वर्षमुनिको खुला कोटाबाट केन्द्रीय सदस्य पदमा उम्मेदवारी दिएका छन्। कोशी प्रदेशका युवाको प्रतिनिधित्व गर्दै भण्डारीले पार्टीभित्र युवा सहभागिता, पुस्तान्तरण र नयाँ राजनीतिक सोचलाई प्राथमिकतामा राख्ने बताएका छन्।

विद्यार्थी जीवनदेखि नै सामाजिक तथा राजनीतिक गतिविधिमा सक्रिय भण्डारीले युवाको बढ्दो विदेश पलायनलाई रोक्न स्वदेशमै शिक्षा, रोजगारी र उद्यमशीलताको वातावरण निर्माण गर्नुपर्नेमा जोड दिएका छन्।

उनले नेपालमा अवसरको अभावका कारण विदेशिन बाध्य युवालाई स्वदेशमै भविष्य निर्माण गर्ने वातावरण बनाउन राज्य र राजनीतिक दलले विशेष पहल गर्नुपर्ने बताए। विदेशमा रहेका गैरआवासीय नेपालीको ज्ञान, सीप, पूँजी र अनुभवलाई नेपालको विकाससँग जोड्न सके मुलुकको आर्थिक तथा सामाजिक रूपान्तरणमा महत्वपूर्ण योगदान पुग्ने उनको भनाइ छ।

भण्डारीले कांग्रेसभित्र युवालाई निर्णय प्रक्रियामा अर्थपूर्ण रूपमा सहभागी गराउँदै नयाँ पुस्ताको ऊर्जा र सिर्जनशीलतालाई संगठन सुदृढीकरणमा प्रयोग गर्नुपर्ने बताए। लोकतान्त्रिक मूल्य, सामाजिक न्याय र जनउत्तरदायी राजनीतिक संस्कारलाई आत्मसात् गर्दै आफू राजनीतिलाई सेवाको माध्यमका रूपमा अघि बढाउने प्रतिबद्धतासमेत उनले जनाएका छन्।

‘पहिले देश र जनता, त्यसपछि आफू’ भन्ने मान्यताका साथ अघि बढ्ने बताउँदै भण्डारीले आफ्नो उम्मेदवारीलाई युवा पुस्ताको आवाज र नयाँ राजनीतिक संस्कारको प्रतिनिधित्वका रूपमा लिन महाधिवेशन प्रतिनिधिहरूसँग आग्रह गरेका छन्।