हरि आचार्य, कपिलवस्तु
नेकपा (एमाले) कपिलवस्तु क्षेत्र नंं १ ले घरदैलो तथा मतदाता भेटघाटलाई तिब्रता दिएको छ । जिल्लाको बाणगंगा ८ मा वडा कमिटीद्धारा आयोजित चुनाव प्रचार प्रसार कार्यक्रममा बोल्दै पार्टीका पोलिटब्युरो सदस्य बिमला घिमिरेले देशको राष्ट्रियता बचाउन र जनताका चाहाना पुरा गर्नका लागि एमालेका उम्मेद्धवारलाई जिताउनुपर्नेमा जोड दिनुभएको छ । राष्ट्रिय सभा सांसद समेत रहनुभएकी घिमरले कपिलवस्तुको विकास लागि सुर्य ध्वजावाहक उम्मेद्वारलाई जिताउन आग्रह गर्नुभयो ।
प्रतिनिधि सभा सदस्यका उम्मेद्वार बलराम अधिकारीले वातावरण मैत्री र दिगो विकासमा जोड दिने बताउनुभएको छ । मंसिर ४ गते हुने प्रतिनिधि तथा प्रदेश सभाको निर्वाचन अन्तर्गत बाणगंगाका विभिन्न ठाउँमा घरदैलो तथा मतदाता भेटघाटको क्रममा संविधान सभा सदस्य समेत रहनुभएका अधिकारीले शान्ताकुञ्ज मधुवन धाम सांस्कृतिक, पर्यटन तथा धार्मिक स्थलको ठुलो सम्भाव्यता बोकेको मुख्य स्थल रहेकाले यसको वृहत्तर विकासमा जोड दिने बताउनुभयो । उहाँले मधुवनधामसंगै जलेश्वर धामलाई पनि दिगो विकास तर्फ विशेष ध्यान दिने बताउनुभयो ।
त्यस्तै मायादेवी रंगशालाले पनि उचित संरक्षण र प्रवद्र्धन पाउनका लागि एमालेको विकल्प नरहेको प्रतिनिधी सभा सदस्य पदका उम्मेद्वार अधिकारीले बताउनुभएको छ । उहाँले रंगशालाको विकास भएसंगै खेलकुद क्षेत्रमा ठुलो उपलब्धि हासिल हुने बताउदै यस ठाउँको समेत पहिचान समेत झल्किने दावि गर्नुभयो । त्यस्तै उहाँले शैक्षिक क्षेत्रमा व्यापक सुधारमा आफ्नो विशेष जोड रहने बताउदै बाणगंगा ८ मोर्मी बुटकामा कोइली नदीको पानी प्रयोग गरि जलविहार बनाउने समेत बताउनुभएको छ ।
क्षेत्र नंं. १ (क) प्रदेश सभा सदस्यका उम्मेद्वार बिष्णु पन्थीले बर्षौ देखि गम्भिर समस्याको रुपमा रहेको कोईली नदीको पुल निर्माणका लागि आफुले धेरै प्रयास गरेकाले आफ्नै पहलमा प्रदेश सरकारबाट बजेट विनियोजन भएकाले त्यसको काम अब छिट्टै सुरु हुने बताउनुभयो । यस अघि पनि प्रदेश सांसद हुंदा लोकप्रिय काम गर्नुभएका एमाले नेता पन्थीले प्रदेशको विकासका लागि एमालेको विकल्प नरहेको बताउनुभयो । पन्थीले प्रसिद्ध धार्मिक स्थल लक्ष्मणघाटकोे विकासमा विशेष जोड दिईएको बताउनुभएको छ । यस अगाडि पनि लक्ष्मणघाटको विकासका लागि विशेष पहल गर्दै आउनुभएका पन्थीले एमालेका उम्मेद्वारलाई जिताएमा मात्र दिगो विकासको सपना पुरा हुने बताउनुभयो । उहाँले देशमा राष्ट्रियता र राजनीतिक स्थिरताका लागि एमालेको बहुमत आवश्यक रहेको बताउनुभयो ।
क्षेत्र नं. १ (ख) प्रदेश सभा सदस्य पदका उम्मेद्वार मधुसुदन शरण चौधरीले शुद्धोधन गाउँपालिकाका लवनी, बगदी लगायत विभिन्न स्थान तथा मायादेवी गाउँपालिकाका पनि विभिन्न ठाउँमा मतदाता भेटघाट गर्नुभएको छ । आगामि योजनाका साथ जनतामाझ जानुभएका चौधरीले मधेशी समुदायको समग्र विकासका लागि आफ्नो उम्मेद्वारी रहेको बताउनुभयो । विशेष गरि मधेशी समुदायलाई सामाजिक रुपान्तरणको आवश्यकता रहेकाले भौतिक विकाससंगै अगाडि बढ्ने उहाँले प्रतिवद्धता व्यक्त गर्नुभएको छ ।
