कपिलवस्तु, कात्तिक १३
कपिलवस्तुको बाणगंगा नगरपालिका चार नम्बर मन्द्रेली टोल बस्ने एक विपन्न परिवारलाई उपचारार्थ आर्थिक सहयोग प्रदान भएको छ । दलित परिवारका ३३ बर्षिय बिष्णु बहादुर नेपालीको आर्थिक समस्या भएपछि उपचारका लागि अस्पताल जान नसकेको दयनीय अवस्था रहेको समाचार विभिन्न सञ्चार माध्यममा माध्यममा आएसंगै रुपन्देहीको सैनामैना पानबारी हाल दुबई बस्ने केशव भट्टराईले सहयोग स्वरुप रु. १० हजार पठाउनु भएकोमा उक्त रकम पिडित परिवारलाई हस्तान्तरण गरिएको छ । मानवीय सहयोग स्वरुप उक्त रकम पठाएको र अन्य क्षेत्रमा समेत सहयोग गर्दै आएको भट्टराईले बताउनुभयो । उहाँले यी परोपकारी र सामाजीक कार्यहरू विगत देखि नै गर्दै आउनु भएको छ। पिडित परिवारले सहयोगी भट्राईलाई धन्यवाद व्यक्त गरेका छन् । घरमा आर्थिक जोहो गरि छाक टार्ने घरमुली नै विरामी परि थला परेपछि अहिले ५ जनाको परिवार विचल्लीमा परेको छ ।
प्युठानको ऐरावती गाउँपालिका विजुली गाउँ स्थायी ठेगाना रहेको उक्त नेपाली परिवार करिव ८/९ बर्ष देखि बाणगंगामा भाडामा बसोवास गर्दै आएको थियो हाल चार नम्बर जितुरको मन्द्रेली टोलमा बसोवास रहेको छ । विरामी नेपालीको स्वास्थ्य समस्या झन जटिल बन्दै गए पछि सहयोग गरिदिनुहुन उहाँकी श्रीमती बसन्ता नेपालीले अनुरोध गर्नुभएको छ । नेपालीका एउटा २ बर्षिय छोरो तथा १० र ६ बर्षिया २ वटा छोरी रहेका छन् । छोरीहरुले कक्षा ४ र यु केजीमा अध्ययन गर्छन् ।
करिव २० बर्ष देखिनै गाडी चलाउने पेशा गर्दै आउनुभएका नेपाली यस भन्दा पहिला विरामी हुनुभएको थियो जस्ले कमाएको सबै रकम खर्च भईसको छ । ‘करिव ५० लाख उपचारमै सकियो, अवस्था अहिले झन जटिल बन्दै गएको, राम्रो ठाउँमा उपचार गर्न पैसा छैन’, श्रीमती नेपालीले निराश हुंदै दुःखेसो पोख्नुभयो ।
नेपालीको पेट र मृगौलामा समस्या छ भने शरिर सबै सुन्निएको छ । जसले गर्दा हिड्डुल गर्न, खाना खान, बोल्न निकै गाह्रो भएको छ । ‘घरमा श्रीमान विरामी, छोराछोरी ससाना त्यसैले मैले पनि केहि काम गर्न पाएको छैन, जस्ले गर्दा घर चलाउन पनि निकै गाह्रो भएको छ’, श्रीमती नेपाली भन्नुभयो ।
सुरुमा निकै धेरै ठाउँमा झारफुक गरेको तर नेपालीको अवस्थामा सुधार नआएकाले राम्रो ठाउँमा उपचारका लागि नेपाली परिवारले अनुरोध गरेको छ । सहयोग गर्न ईच्छुक व्यक्ति वा संघ संस्थाले मेगा बैंकमा रहेको बसन्ता नेपाली खाता नाम रहेको र खाता नम्बर ०३९००५००६१४९७ रहेको खातामा रकम पठाईदिनुहुन परिवारले आग्रह गरेको छ ।
