हरि आचार्य, कपिलवस्तु
राष्ट्रिय युवा संघ नेपाल बाणगंगा नगर कमिटीको प्रथम पुर्ण बैठक महत्वपुर्ण निर्णयका साथ सम्पन्न भएको छ । राष्ट्रिय युवा संघ नेपालको आसन्न राष्ट्रिय महाधिवेशन र संगठन विस्तारको एजेन्डामा केन्द्रित प्रथम पुर्ण बैठकमा विभिन्न महत्वपुर्ण निर्णय गरिएको छ । पार्टी कार्यालय वैरीयामा सम्पन्न बैठकमा सचिवालय गठन, जिम्मेवारी बाँडफाँड, सदस्यता विस्तार, महाधिवेशन प्रतिनिधि चयन लगायत विविध एजेण्डाहरुमा छलफल गरि निर्णय गरिएको राष्ट्रिय युवा संघ नेपाल बाणगंगा नगर कमिटी अध्यक्ष बलराम खनालले जानकारी दिनुभयो ।
बैठकलाई सम्बोधन गर्दै प्रमुख अतिथि राष्ट्रिय युवा संघ नेपाल प्रदेश सह ईन्चार्ज धनु अधिकारीले राजनीतिमा युवाहरुले नेतृत्व लिनुपर्ने समय आएकाले बैचारिक तथा सांगठनिक हिसावले पार्टीलाई अघि बढाउन युवाहरुको भूमिका अहंम हुने बताउनुभएको छ । पार्टी प्रदेश कमिटी सदस्य समेत रहनुभएका अधिकारीले पार्टीका लागि युवा संघको अहम भुमिका रहेकाले पार्टीलाइ बलियो बनाउने युवा संघ नै रहेको जिकिर गर्नुभयो । उहाँले राष्ट्रको समृद्धि, देशको विकास र सामाजिक न्यायका लागि नेकपा एमाले नै उत्तम विकल्प रहेको बताउनुभयो ।
त्यस्तै संगठनका जिल्ला सह ईन्चार्ज गोपाल मणि ज्ञवालीले जिल्ला कमिटीसंगै सबै पालिका कमिटी अब तदारुकताका साथ लाग्न निर्देशन दिंदै साथ सदैव रहेको बताउनुभयो । उहाँले पार्टीलाई आवश्यक परेको खण्डमा साथ र सहयोगका लागि तयारी अवस्थामा बस्न सबैलाई निर्देशन समेत दिनुभएको छ । उहाँले पार्टी र पार्टी नेतृत्व प्रति सामाजिक संजालमा छरिएको भ्रम युवाहरुले चिर्न जरुरी रहेको बताउनुभयो ।
त्यस्तै नेकपा (एमाले) बाणगंगा नगर कमिटी अध्यक्ष सोमनाथ अर्यालले युवाहरुका माग, आवश्यकता र युवा लक्षित योजना बनाई पार्टीमा पेश गर्न युवालाई अनुरोध गर्दै युवाहरु पार्टीका मेरुदण्ड रहेको बताउनुभयो ।
त्यस्तै राष्ट्रिय युवा संघ नेपाल जिल्ला कमिटी कपिलवस्तुका अध्यक्ष तिलक गिरीले संगठनको राष्ट्रिय महाधिवेशनको बारेमा विस्तृत जानकारी दिंदै युथ सेलिब्रेसनमा उपस्थित सबैलाई धन्यवाद व्यक्त गर्नुभयो । जिल्ला अध्यक्ष गिरीले नगरका सबै वडामा संगठन विस्तार संगै सबै वडा कमिटीहरुलाई सक्रिय बनाउनका लागि नगर कमिटीलाई निर्देशन दिनुभयो ।
राष्ट्रिय युवा संघ नेपाल बाणगंगा नगर कमिटी अध्यक्ष बलराम खनालले बैठक सफल पार्न सहयोग गर्नुहुने सम्पुर्णलाई आभार व्यक्त गर्दै पार्टीको निर्देशन अनुसार नगर कमिटी अगाडि बढ्ने बताउनुभयो । बैठकका अध्यक्ष समेत रहनुभएका खनालले नगर कमिटी सदस्यता विस्तार र संगठन विस्तारमा लागिपर्ने बताउनुभयो ।
बैठकमा पार्टी जिल्ला उपाध्यक्ष शंकर पाण्डेले पनि संगठनलाई आवश्यक निर्देशन दिनुभएको थियो । पार्टी जिल्ला कमिटी सदस्य भिष्मराज भुसाल, पार्टीका नगर कमिटी सचिवालय सदस्य तथा संगठनका नगर ईन्चार्ज सरोजमणि पौडेल, संगठनका पदाधिकारी तथा सदस्यहरुको उपस्थिती रहेको बैठक नगर कमिटी उपाध्यक्ष सह सचिव शिव शर्माको स्वागत मन्तब्य तथा सचिव बिकास भट्टराईको संचालनमा सम्पन्न भएको हो ।
