रुपन्देही क्षेत्र नम्बर ३ मा हुने उपनिर्वाचनका लागि राष्ट्रिय स्वतन्त्र पार्टी रास्वपा बाट उम्मेदवार बन्न ९ जनाले आवेदन दिएका छन् । रास्वपाले बिहीबार सामाजिक सञ्जाल फेसबुक पेजबाट लाइभमार्फत आवेदकहरूको सूची सार्वजनिक गरेको हो ।आवेदन दिनेमा ज्ञानु पौड्याल, सुलभ खरेल, पार्थिवेन्द्र उपाध्याय, डा। लेखजंग थापा, जीत बहादुर गुप्ता, कुसुम महर्जन, रचना क्षेत्री, पुनम कुमारी अग्रवाल र मधु प्रसाद अर्याल रहनुभएको छ ।
उम्मेदवारी दिन इच्छुक व्यक्तिमा ज्ञानु पौड्याल सहकारी अभियन्ता हुनुहुन्छ । उहाँ विगत लामो समयदेखि महिला तथा बालबालिकाको क्षेत्रमा कार्य गर्दै आउनुभएको छ । जनउत्थान सहकारीमा लामो समय काम गर्नु भएकी तथा हाल दुध प्रसोधन केन्द्र लुस्कुनमा अध्यक्ष रहनु भएकी पौड्याल सामाजिक क्षेत्रमा पनि क्रियाशील हुनुहुन्छ ।क्षेत्रीय सभापति मधु अर्याल शिक्षण पेशामा आबद्ध हुनुहुन्छ । उहाँ तिलोत्तमाका विद्यालय सञ्चालक हुनुहुन्छ । त्यस्तै डा। लेखजंग थापा न्यूरो सर्जन हुनुहुन्छ । केन्द्रीय सदस्य कुसुम महर्जन २०७९ सालको निर्वाचनमा पार्टीको तर्फबाट समानुपातिक सूचीमा हुनुहुन्थ्यो । उक्त सूचीबाट नाम फिर्ता गरेर उनी उम्मेदवारीको दौडमा सहभागी हुनुहुन्छ ।
पुनम अग्रवाल रोहिणी गाउँपालिका वडा नम्बर ४ स्थित कोटहवामा ‘ग्रो मोर फर्टिलाइजर एण्ड केमिकलको प्रबन्ध निर्देशक हुनुहुनुहुन्छ । प्राध्यापन पेशामा रहनुभएका उपाध्यायले हिजो मात्रै रुपन्देही क्याम्पस प्रमुख पदबाट राजीनामा दिएको सामाजिक सञ्जाल फेसबुकमार्फत सार्वजनिक गर्नुभएको थियो । गुप्ता रास्वपा लुम्बिनी प्रदेश सदस्य तथा २०७९ सालमा प्रतिनिधि सभा सदस्यको उम्मेदवार हुनुहुन्थ्यो । क्षेत्री पार्टीको जिल्ला कोषाध्यक्ष हुनुहुन्छ । सुलभ खरेल अमेरिकाबाट निर्वाचनकै लागि आउनुभएको छ ।
शुक्रबार भोलि बिहान १० बजेदेखि शनिबार पर्सी साँझ ५ बजेसम्म उम्मेदवारीमाथि दावीविरोध गर्न सकिने रास्वपा सह–महामन्त्री तथा रुपन्देही–३ का चुनावी कमाण्डर विपिन आचार्यले जानकारी दिनुभयो ।यसका लागि रास्वपाको केन्द्रीय निर्वाचन आयोगमा उजुरी दिनुपर्ने छ । साउन २६ गते प्रारम्भिक उम्मेदवारहरूको नामावली प्रकाशित गरिनेछ ।त्यस्तै रास्वपाले आवेदन दिएकाहरूमध्येबाट उम्मेदवार छान्न प्रारम्भिक निर्वाचन गर्ने भएको छ । जसको अंकभार ५० प्रतिशत हुनेछ । जसका लागि भदौ १२ गते बिहान ७ बजेदेखि १३ गते साँझ ७ बजेसम्म प्रारिम्भक निर्वाचन हुने र त्यसमा रुपन्देही–३ का रास्वपा पार्टी सदस्यहरू र केन्द्रीय सदस्यहरुले मतदान गर्न पाउने आचार्यले बताउनुभयो ।
प्रारम्भिक निर्वाचनबाट पाउने ५० प्रतिशत अंकभारलाई सय प्रतिशत मानेर चुनाव हुँदा रुपन्देही–३ मा रास्वपा सदस्यको मतभार ८० प्रतिशत र त्यही क्षेत्रमा रास्वपाको समितिमा रहेका सदस्यको अंकभार १० प्रतिशत हुनेछ ।त्यस्तै केन्द्रीय सदस्यको १० प्रतिशत हुनेछ । प्रारम्भिक निर्वाचनबाट प्राप्त अंक र पार्टीले गर्ने निर्णयबाट उम्मेदवार तय गरिनेछ । रास्वपाले रुपन्देही–३ को उपनिर्वाचनलाई आफ्नो प्रतिष्ठाको रुपमा लिएको छ ।