कुवेतमा मिथानोल मिसिएको विषाक्त मदिरा सेवनका कारण मृत्यु हुनेहरूको संख्या २३ पुगेको छ । यीमध्ये ९ जना नेपाली रहेको गैरआवासीय नेपाली संघ राष्ट्रिय समन्वय परिषद्का अध्यक्ष गिरीप्रसाद आचार्यले जानकारी दिएका छन् ।
परिषद्का अध्यक्ष विकास बहादुर सिंह ,विकास सिंह ठकुरी र सचिव सुरेन्द्र लिम्बूले जारी गरेको अपिल पत्रमा भनिएको छ कि कुवेत सरकारको आधिकारिक तथ्यांक अनुसार विषाक्त मदिरा सेवनका कारण हालसम्म २३ जनाको मृत्यु भइसकेको छ भने १६० जना अस्पतालमा उपचाररत छन् । यसमा नेपालीसहित अन्य एसियाली देशका नागरिक पनि रहेका छन् ।
परिषद्ले यस घटनाप्रति गहिरो दुःख व्यक्त गर्दै कुवेतमा मदिरा सेवन, बिक्री र वितरण पूर्ण रूपमा निषेध गरिएको कुरा पुनः उल्लेख गरेको छ । परिषद्ले सबैलाई यस प्रकारका अवैध र घातक कार्यहरूमा संलग्न नहुने, आफ्नो स्वास्थ्य र सुरक्षालाई प्राथमिकतामा राख्ने तथा कुवेतको कानुन कडाइका साथ पालना गर्ने अपिल गरेको छ ।
यसैगरी नेपाली दूतावासले पनि पछिल्ला तीन दिनमा ९ नेपालीको मृत्यु भएको र १५ भन्दा बढी नेपालीहरू अस्पतालमा उपचाररत रहेको जानकारी दिएको छ । दूतावासका अनुसार मृत्युका कारणबारे मेडिकल रिपोर्ट प्राप्त भएपछि मात्रै स्पष्ट विवरण दिन सकिनेछ ।
परराष्ट्र मन्त्रालयले पनि यस घटनाबारे जानकारी लिन सम्बन्धित निकायलाई निर्देशन दिएको छ ।