सरिता थारु, कपिलवस्तु । “स्वास्थ्य नै धन हो” भन्ने मूल नाराका साथ कोपवा स्वास्थ्य चौकीमा आयोजित बृहत् निःशुल्क स्वास्थ्य शिविर आज सफलतापूर्वक सम्पन्न भएको छ। शिविरमा ४ सय ९० जनाले निःशुल्क स्वास्थ्य परीक्षण गराएका छन्।
कोपवा स्वास्थ्य चौकी प्रमुख जीवन खनालका अनुसार स्वास्थ्य जाँच गराउनेमध्ये ३ सय २ जना महिला र १ सय ८८ जना पुरुष रहेका छन्। शिविरमा २ सय ४ जनाले हाडजोर्नी तथा नसासम्बन्धी, १ सय ६ जनाले मुटुरोग, ९५ जनाले स्त्री तथा प्रसूति रोग, १८ जनाले मानसिक रोगको परीक्षण गराएका छन् भने अन्य सेवाग्राहीले भिडियो एक्स–रे सेवा लिएका थिए।
कोपवा स्वास्थ्य चौकीको आयोजनामा, बाणगंगा नगरपालिका–५ नं। वडा कार्यालयको समन्वय, श्री बागेश्वरी सामुदायिक वन उपभोक्ता समूहको आर्थिक सहयोग तथा श्री लुम्बिनी सिटी हस्पिटल बुटवलको प्राविधिक सहयोगमा शिविर सम्पन्न भएको हो।
कार्यक्रम वडा नं। ५ का वडा अध्यक्ष एवं कोपवा स्वास्थ्य चौकी व्यवस्थापन समिति अध्यक्ष दुनिका भुषालको अध्यक्षता, नगर प्रमुख चक्रपाणी अर्यालको प्रमुख आतिथ्यता र उपप्रमुख रिता कुमारी चौधरीको विशिष्ट आतिथ्यतामा सम्पन्न भएको थियो।
कार्यक्रमलाई सम्बोधन गर्दै प्रमुख अतिथी नगर प्रमुख चक्रपाणी अर्यालले स्वास्थ नागसिक नै समृद्ध नगरको आधार भएको उल्लेख गर्नुभयो । उहाले नगरवासीको स्वास्थ्य सुरक्षाका लागि यस्ता निःशुल्क शिविर प्रभावकारी हुने बताउदै नगरले विगतका बर्षहरु देखि निशुल्क आँखा चेकजाँच शिविर, स्वास्थ्य शिविर संचालन गर्दै आएको बताउनुभयो । नगरपालिकाले प्राथमिक स्वास्थ्य सेवालाई अझ बलियो बनाउँदै लैजाने प्रतिबद्धता समेत जनाउनु भयो ।
त्यसैगरी उपप्रमुख रिता कुमारी चौधरीले महिलाको स्वास्थ्यमा विशेष ध्यान दिन आवश्यक रहेको बताउँदै महिला र बाल स्वास्थ्य सुदृढ भए मात्रै समाज समुन्नत हुने औल्याउनु भयो । यस्ता शिविरले ग्रामीण भेगका नागरिकलाई प्रत्यक्ष लाभ पुर्याएको उहाले जिकिर गर्नुभयो ।
वडा अध्यक्ष दुनिका भुषालले वडा तहबाट स्वास्थ्य क्षेत्रमा निरन्तर सहकार्य गरिने प्रतिबद्धता जनाउँदै कोपवा स्वास्थ्य चौकीलाई अझ व्यवस्थित र सेवामुखी बनाउन स्थानीय सरकार सधैं तयार रहेको बताउनुभयो ।
शिविरमा वडा नं। ७ का वडा अध्यक्ष विष्णु गिरी, श्री बागेश्वरी सामुदायिक वन उपभोक्ता समूहका अध्यक्ष लेम बहादुर गुरुङ, लुम्बिनी सिटी हस्पिटलका अर्थोपेडिक डाक्टर सोम आले, फिजिसियन डा। पातल गिरी, वरिष्ठ गायनेकोलोजिष्ट डा। प्रदीप श्रीवास्तव, अस्पतालका पब्लिक रिलेसन अफिसर, नेपाल पत्रकार महासंघ लुम्बिनी प्रदेश सदस्य सरिता थारु लगायतको आतिथ्यता रहेको थियो।
कार्यक्रममा बाणगंगा नगरपालिका स्वास्थ्य शाखा प्रमुख ठगराज पौडेलले स्वागत मन्तव्य राख्नुभएको थियो भने कार्यक्रम सञ्चालन सूचना अधिकारी अग्नीभेष गौतमले गर्नुभएको थियो।
यसैविच आर्थिक सहयोग गरेको भन्दै श्री बागेश्वरी सामुदायिक वन उपभोक्ता समुहका अध्यक्ष लेम बहादुर गुरुलाई सम्मान समेत गरिएको थियो ।
स्थानीयवासीले आफ्नै वडामा विशेषज्ञ डाक्टरबाट निःशुल्क सेवा पाउँदा खुसी व्यक्त गर्दै आगामी दिनमा पनि यस्ता स्वास्थ्य शिविर निरन्तर आयोजना गर्न माग गरेका छन्।
