लुदस,जितपुर । कपिलवस्तुको बाणगंगा नगरपालिकाको १९ औँ नगरसभाले आगामी आर्थिक वर्षका लागि २ अर्ब ३३ करोड ७३ लाख रुपैयाँ बराबरको बजेट सर्वसम्मत रूपमा पारित गरेको छ।
बुधबार सम्पन्न नगरसभामा उपप्रमुख रिता कुमारी चौधरीले बजेट प्रस्तुत गर्दै समग्र नगर विकास, प्रभावकारी सेवा प्रवाह तथा नागरिकको जीवनस्तर सुधारलाई केन्द्रमा राखेर बजेट विनियोजन गरिएको बताईन ।
नगर प्रमुख चक्रपाणी अर्यालले शिक्षा, स्वास्थ्य र पूर्वाधार विकासलाई उच्च प्राथमिकतामा राखी नीति तथा कार्यक्रम तयार गरिएको जानकारी दिए । उनले नगरवासीको आवश्यकता र विकासका लक्ष्यअनुसार बजेट तथा कार्यक्रम ल्याइएको उल्लेख गरे ।
नगरसभामा प्रस्तुत नीति, कार्यक्रम तथा बजेटमाथि छलफलपछि सर्वसम्मत रूपमा पारित गरिएको हो। नगरपालिकाले शिक्षा, स्वास्थ्य, कृषि, सडक पूर्वाधार, खानेपानी तथा सामाजिक विकासका क्षेत्रमा प्राथमिकताका साथ बजेट कार्यान्वयन गर्ने जनाएको छ।
नगरसभामा जनप्रतिनिधि, कर्मचारी, सञ्चारकर्मी तथा सरोकारवालाहरूको सहभागिता रहेको थियो। आगामी आर्थिक वर्षमा नगरको दिगो विकास र सेवा प्रवाहलाई थप प्रभावकारी बनाउने अपेक्षा गरिएको नगरपालिकाले जनाएको छ।
