काठमाडौं । सरकारले उपभोक्तालाई सक्कली बिल लिन प्रोत्साहित गर्न नगद उपहारसहितको ‘करदाता प्रोत्साहन उपहार कार्यक्रम’ लागू गरेको छ ।
अर्थ मन्त्रालयले नयाँ कार्यविधि जारी गर्दै बिल लिने उपभोक्तामध्ये दैनिक र पाक्षिक रूपमा गोलाप्रथामार्फत विजेता छनोट गरी नगद पुरस्कार प्रदान गर्ने व्यवस्था गरेको हो ।
कार्यक्रमअनुसार नेपालभित्र एक पटकमा १०० रुपैयाँभन्दा बढीको वस्तु वा सेवा खरिद गर्ने उपभोक्ता सहभागी हुन सक्नेछन् ।
डिजिटल माध्यमबाट गरिएको भुक्तानी स्वतः प्रणालीमा समावेश हुनेछ भने नगद कारोबार गर्नेले बिल नम्बर, बिक्रेताको प्यान, बिल जारी मिति, खरिद रकम, भुक्तानीको प्रकार, आफ्नो नाम र मोबाइल नम्बर विभागको प्रणालीमा दर्ता गर्नुपर्नेछ ।
आन्तरिक राजस्व विभागले प्रत्येक महिनाको १ र १६ गते स्वचालित प्रणालीबाट विजेता छनोट गर्नेछ । दैनिक एक जना विजेताले १ लाख ३३ हजार ३३४ रुपैयाँ प्राप्त गर्नेछन् भने प्रत्येक पाक्षिक अवधिको बम्पर विजेतालाई १० लाख रुपैयाँ प्रदान गरिनेछ । उपहार रकमबाट कानुनअनुसार २५ प्रतिशत आकस्मिक लाभकर कट्टा हुनेछ । तर व्यवसायिक प्रयोजनका खरिद, सरकारी निकायको नाममा जारी भएका बिल, विद्युत, टेलिफोन, इन्टरनेट, हवाई टिकट, ढुवानी तथा प्यानबिनाका बिक्रेताबाट जारी बिल भने यस योजनामा समावेश हुने छैनन्।
विजेतालाई मोबाइल र इमेलमार्फत जानकारी गराइनेछ । उपहार दाबी गर्न १५ दिनभित्र सक्कल बिल, परिचयपत्र, प्यान र बैंक खाताको विवरणसहित सम्बन्धित आन्तरिक राजस्व कार्यालयमा निवेदन दिनुपर्ने व्यवस्था गरिएको छ ।
सरकारले यस योजनाले सक्कली बिल लिने संस्कृतिलाई प्रवर्द्धन गर्दै कर प्रणालीलाई थप पारदर्शी र प्रभावकारी बनाउने विश्वास लिएको छ ।
