थानेश्वर अधिकारी ।
श्रावण महिनालाई भगवान शिवको आराधना, भक्ति र आध्यात्मिक साधनाको पवित्र अवसरका रूपमा मनाउँदै लक्ष्मणघाट बोलबमधाम विकास समितिले २०८३ साल श्रावण १३ गते (गुरु पूर्णिमा) देखि भाद्र १२ गते (जनै पूर्णिमा) सम्म एकमहिने श्रावणी बोलबम धार्मिक मेला आयोजना गर्ने भएको छ।
समितिका अध्यक्ष रणबहादुर काउचाका अनुसार प्रत्येक वर्षझैँ यस वर्ष पनि हजारौँ श्रद्धालु भक्तजनको सहभागितामा धार्मिक मेला सञ्चालन गरिनेछ। मेलाको मुख्य आकर्षणका रूपमा भक्तजनले सातौँ भागिरथी नदीमा पवित्र स्नान गरी धामका पुजारीबाट वैदिक विधिअनुसार जल सङ्कल्प गराउने र त्यसपछि १०८ शिवलिङ्ग तथा शिव मन्दिरमा जलार्पण गर्ने व्यवस्था मिलाइएको छ। यस धार्मिक अनुष्ठानले भक्तजनमा आध्यात्मिक ऊर्जा, शान्ति र श्रद्धाको भावना अझ प्रगाढ बनाउने विश्वास गरिएको छ।
मेला अवधिभर धार्मिक तथा सांस्कृतिक कार्यक्रमहरू निरन्तर सञ्चालन हुनेछन्। प्रत्येक आइतबार साँझ ६:३० बजेदेखि भव्य गङ्गा आरती गरिनेछ भने राति ९:०० बजेदेखि १२:०० बजेसम्म कपिलवस्तु युवा भजन समूहद्वारा विशेष शिवभजन तथा भक्तिमय सांगीतिक प्रस्तुति रहने सचिव प्रकाश भुसालले जानकारी दिए।
धार्मिक आस्था, सांस्कृतिक परम्पराको संरक्षण तथा धार्मिक पर्यटन प्रवर्द्धन गर्ने उद्देश्यले आयोजना गरिएको यस मेलाले लुम्बिनी प्रदेशकै प्रमुख शिवधाममध्ये एक लक्ष्मणघाट बोलबमधाम लाई थप परिचित बनाउने अपेक्षा गरिएको छ। आयोजकले देश–विदेशमा रहनुभएका सम्पूर्ण श्रद्धालु भक्तजनलाई मेलामा सहभागी भई भगवान शिवको दर्शन, पूजा–आराधना तथा धार्मिक पुण्य लाभ लिन हार्दिक आग्रह गरेको छ।
मेलाका संरक्षकमा बाणगङ्गा नगरपालिका–६ वडा कार्यालय र सह–आयोजकमा लक्ष्मणघाट सामाजिक विकास केन्द्र तथा कपिलवस्तु युवा भजन समूह रहेका छन् ।
