जितपुर । बाणगंगा नगरपालिकाको आर्थिक वर्ष २०८३/८४ को पहिलो कार्यपालिका बैठकले विकास निर्माण, सेवा प्रवाह तथा पूर्वाधार व्यवस्थापनसँग सम्बन्धित महत्वपूर्ण निर्णयहरू गरेको छ। बैठकले आर्थिक वर्ष २०८३/८४ को नीति, कार्यक्रम, बजेट कार्यान्वयन योजना तथा वार्षिक कार्ययोजना सर्वसम्मत रूपमा स्वीकृत गरेको हो।
बैठकले आर्थिक वर्ष २०८२/८३ को वार्षिक समीक्षा कार्यक्रम साउन २१ गते बिहीबार बिहान ११ बजे नगरपालिकाको सभा हलमा आयोजना गर्ने निर्णय गरेको छ।
त्यसैगरी, आर्थिक वर्ष २०८३/८४ का लागि नगर दररेट स्वीकृत गरिएको छ। नगर दररेट पारित भएसँगै नगरपालिकाअन्तर्गतका विकास आयोजना तथा योजनाहरू कार्यान्वयन प्रक्रियामा अघि बढ्ने भएका छन्।
नगरमा उद्योग तथा उद्यम प्रवर्द्धनलाई संस्थागत रूपमा अघि बढाउने उद्देश्यसहित उद्योग शाखा स्थापना गर्ने निर्णय पनि बैठकले गरेको छ। उक्त शाखा स्थापना भएपछि स्थानीय उद्यमी तथा व्यवसायीलाई सेवा प्रवाह थप सहज हुने अपेक्षा गरिएको छ।
बैठकले विगतदेखि सञ्चालन हुँदै आएको पूर्ण संस्थागत प्रसूति सेवा अन्तर्गतको निःशुल्क एम्बुलेन्स सेवालाई अझ प्रभावकारी, व्यवस्थित र सेवामुखी बनाउन २०७७ सालमा जारी कार्यविधि संशोधन गर्ने निर्णय पनि गरेको छ।
यसैबीच, नगरभित्र निर्माण भएका तथा निर्माणाधीन ठूला पूर्वाधार संरचनाको संरक्षण, सञ्चालन र दीगो उपयोग सुनिश्चित गर्न स्थानीय पूर्वाधार संरक्षण तथा उपयोग व्यवस्थापन समिति गठन गर्ने निर्णय गरिएको छ।
समितिमा सम्बन्धित वडाका वडा अध्यक्ष संयोजक रहनेछन् भने वडा सदस्यहरू, सम्बन्धित पूर्वाधारसँग सरोकार राख्ने संस्था वा समूहका प्रतिनिधि, एक महिलासहित वडा अध्यक्षले मनोनयन गर्ने कम्तीमा दुई जना सदस्य, सम्बन्धित वडाका प्राविधिक कर्मचारी तथा वडा सचिव सदस्य–सचिव रहने व्यवस्था गरिएको छ।
समितिको संरक्षकका रूपमा नगर प्रमुख, नगर उपप्रमुख, प्रमुख प्रशासकीय अधिकृत, पूर्वाधार विकास शाखा प्रमुख (इन्जिनियर) तथा योजना शाखा प्रमुख रहने निर्णय गरिएको छ।
नगरपालिकाले कार्यपालिका बैठकबाट भएका निर्णयले चालु आर्थिक वर्षका विकास निर्माण, सेवा प्रवाह तथा पूर्वाधार व्यवस्थापनका कामलाई थप व्यवस्थित, प्रभावकारी र परिणाममुखी बनाउने विश्वास व्यक्त गरेको छ।
