लुदअ चैत ६, सुर्खेत
नेकपा एमालेका वरिष्ठ उपाध्यक्ष ईश्वर पोखरेलले एमाले सरकारबाट बाहिरिए पनि जनताको मनमै रहेको बताउनुभएको छ ।
एमाले कर्णाली प्रदेश कमिटीद्वारा आज आइतवार सुर्खेतमा आयोजित वृहत् कार्यकर्ता भेलालाई सम्बोधन गर्दै उहाँले एमाले जनतासँगै रहेकाले आउँदो चुनावमा पहिलो भएर सरकारमा पुग्ने दाबी गर्नुभयो । ‘एमाले सरकारबाट मात्रै बाहिरिएको हो, जनताको मनबाट बाहिरिएको छैन’, पोखरेलले भन्नुभयो, ‘आम जनताको मन–मनमा एमाले छ । आउँदो चुनावमा अझै शक्तिशाली भएर आउनेछौँ ।’
कार्यक्रममा एमाले कर्णाली प्रदेश इन्चार्ज एवम् स्थायी कमिटी सदस्य यामलाल कँडेलले धेरै दलबाट देशले स्थायित्व नपाउने भन्दै दुई दलीय व्यवस्था आवश्यक रहेको जिकिर गर्नुभयो ।
यही कार्यक्रममा माओवादी केन्द्र परित्याग गर्नुभएका प्रदेश सभा सदस्य ठम्मरबहादुर विष्ट एमालेमा प्रवेश गर्नुभएको छ ।
प्रकाशित : २०७८ चैत्र ६, आईतवार १९:०१
