काठमाडौं । नेपाली राहदानी (पासपोर्ट) छपाइ प्रक्रियासम्बन्धी विषयलाई लिएर सार्वजनिक भएका केही समाचारप्रति काठमाडौंस्थित जर्मन दूतावासले औपचारिक प्रतिक्रिया दिएको छ। दूतावासले जर्मनीका लागि नेपाली कार्यवाहक राजदूतलाई ‘समन’ गरिएको भन्ने समाचार सत्य नभएको स्पष्ट पारेको हो।
दूतावासका अनुसार बर्लिनस्थित नेपाली दूतावासका कार्यवाहक राजदूतलाई नियमित कूटनीतिक संवादका लागि निमन्त्रणा गरिएको थियो। कूटनीतिक अभ्यासमा ‘निमन्त्रणा’ र ‘समन’ फरक प्रकृतिका प्रक्रिया भएकाले ती दुई शब्दलाई एउटै अर्थमा प्रस्तुत गर्नु भ्रामक हुने दूतावासको भनाइ छ।
“बर्लिनमा नेपालका चार्ज डी’अफेयर्सलाई जर्मनको विदेश मन्त्रालयमा भएको बैठकमा आमन्त्रित गरिएको थियो, बोलाइएको (समन) थिएन । यो सानो भिन्नता जस्तो लाग्न सक्छ, तर कूटनीतिमा, यो महत्त्वपूर्ण छ,” जर्मन दूतावासले भनेको छ ।
जर्मन पक्षले उक्त भेटका क्रममा कुनै विरोधपत्र हस्तान्तरण नगरिएको, कुनै प्रकारको औपचारिक आपत्ति नजनाइएको तथा अदालती प्रक्रियासँग सम्बन्धित सम्भावित नतिजाबारे चेतावनीसमेत नदिइएको उल्लेख गरेको छ।
दूतावासले जर्मनीमा न्यायपालिका स्वतन्त्र रहेको संवैधानिक व्यवस्था रहेको स्मरण गराउँदै अदालतमा विचाराधीन विषयमा आफूहरूले टिप्पणी नगर्ने नीति अनुरूप नै यस प्रकरणमा पनि कुनै धारणा व्यक्त नगरेको स्पष्ट पारेको छ।
