काठमाडौं । कञ्चनपुरको शुक्लाफाँटा क्षेत्रमा च्याउ टिप्न गएका बेला सम्पर्कविहीन भएका १४ जना महिला सकुशल फेला परेका छन्। उनीहरू सोमबार बिहान परिवारको सम्पर्कमा आएपछि खोजी अभियान टुंगिएको हो ।
भीमदत्त नगरपालिका–१९ बागफाँटाका ती महिलाहरू आइतबार घर नजिकैको जंगलमा च्याउ संकलन गर्न गएका थिए। साँझसम्म पनि घर नफर्किएपछि आफन्तले प्रहरीलाई खबर गरेका थिए, त्यसपछि सुरक्षा निकायले व्यापक खोजी अभियान सञ्चालन गरेको थियो।
शुक्लाफाँटा राष्ट्रिय निकुञ्ज सुरक्षार्थ खटिएको रणसिंह दल गणका प्रमुख सेनानी प्रकाश घिमिरेका अनुसार सम्पर्कविहीन भएका सबै महिला सुरक्षित अवस्थामा परिवारसँग पुनः भेटिएका छन्।
स्थानीयका अनुसार उनीहरू निकुञ्जको मालुमेला पोस्ट हुँदै जंगलभित्र प्रवेश गरेका थिए। मोबाइल फोन साथमा नहुँदा उनीहरूको अवस्थाबारे जानकारी लिन कठिन भएको थियो, जसका कारण खोजी कार्य चुनौतीपूर्ण बनेको प्रहरीले जनाएको छ।
जिल्ला प्रहरी कार्यालय कञ्चनपुरका अनुसार खोजी अभियानमा नेपाल प्रहरी र नेपाली सेनाको टोली संयुक्त रूपमा परिचालन गरिएको थियो। जंगल क्षेत्रमा व्यापक खोजतलास भइरहेका बेला सोमबार बिहान उनीहरू सकुशल रहेको सूचना प्राप्त भएको हो।
यसैबीच, आइतबार साँझदेखि शुक्लाफाँटा राष्ट्रिय निकुञ्जभित्रै हराएका बेल्डाँडी गाउँपालिका–२ का तीन जना महिलालाई पनि नेपाली सेनाले सकुशल उद्धार गरेको छ। सहसेनानी सुमन जिसीको नेतृत्वमा खटिएको टोलीले उनीहरूलाई फेला पारी सोमबार बिहान परिवारको जिम्मा लगाएको प्रहरीले जनाएको हो।
