हरि आचार्य, कपिलवस्तु
कपिलवस्तुको बाणगंगा नगरपालिकाका नगर प्रमुख चक्रपाणी अर्यालले नगरभित्रका सामुदायिक वनहरूको आयव्यय सन्तोषजनक रहेको र सुशासन तथा पारदर्शिता सहित बजेटको सदुपयोग भइरहेको बताउनुभएको छ । बिहीबार बाणगंगा नगरपालिका–२, नन्दनगर स्थित श्री मनकामना सामुदायिक वन उपभोक्ता समूहको १९औँ साधारणसभालाई सम्बोधन गर्दै नगर प्रमुख अर्यालले यस्तो बताउनुभएको हो । कार्यक्रमका प्रमुख अतिथि समेत रहनुभएका अर्यालले सामुदायिक वनले स्थानीय तहमा बुझाउनुपर्ने कर कार्यान्वयनका लागि प्रदेश सरकारसँग पहल भइरहेको जानकारी दिनुभयो ।
कार्यक्रममा बाणगंगा नगरपालिका–२ का वडाध्यक्ष तथा नगर प्रवक्ता विष्णु पौडेलले सामुदायिक वन र वडा कार्यालयबीचको समन्वयमा विकास निर्माणका कामहरू भइरहेको बताउनुभयो । स्थानीय विकासका गतिविधिलाई प्रभावकारी बनाउन आपसी सहकार्य र समन्वय आवश्यक रहेको उहाँको भनाइ छ ।
साधारण सभामा वनका सचिव गंगा कुमारी भट्राईले प्रगति प्रतिवेदन, कोषाध्यक्ष लक्ष्मी चौधरीले आर्थिक प्रतिवेदन तथा लेखा समिति सदस्य दिपक भुसालले लेखा प्रतिवेदन प्रस्तुत गर्नुभएको थियो भने सबै प्रतिवेदन पारित भएका छन् ।
साधारणसभामा वनका अध्यक्ष मुक्तबहादुर कार्कीले संस्थाका गतिविधि तथा अवस्थाबारे धारणा राख्नुभएको थियो । अध्यक्ष कार्कीले सामुदायिक बनको उत्पादकत्व वातावरणीय सन्तुलन कायम गर्नका लागि वैज्ञानिक तथा दिगो वन व्यबस्थापन, वृक्षरोपण तथा हरियाली प्रवद्र्धन, वन पैदावारको न्यायोचित उपयोग, उपभोक्ताको सामाजिक तथा आर्थिक विकास, वातावरण तथा जैविक विविधता, सुशासन, पारदर्शिता तथा सहभागितालाई मुख्य प्राथमिकतामा राखेर कार्य गरिरहेको बताउनुभयो ।
सामुदायिक वनका पूर्वअध्यक्ष अमित पौडेल, बाणगंगा खानेपानी तथा सरसफाई संस्थाका अध्यक्ष विश्व कार्की, सबडिभिजन वन कार्यालय पिपराका प्रमुख दिनेश जयसवाल, वैज्ञानिक वन महासंघका जिल्ला अध्यक्ष डिल्ली राज रेग्मी, मौरीपालन उत्पादन सहकारी संघका अध्यक्ष लिलापति घिमिरे,वैरीया युवा समाजका सचिव सागर घिमिरे लगायतले शुभकामना मन्तव्य राख्नुभएको थियो ।
साधारणसभामा आर्थिक वर्ष २०८३/०८४ का लागि ९ करोड १४ लाख ५० हजार ७ सय ५० रुपैयाँको अनुमानित बजेट प्रस्तुत गरिएको छ । बनका अध्यक्ष मुक्तबहादुर कार्कीको अध्यक्षतामा सम्पन्न कार्यक्रममा संस्थाका उपाध्यक्ष पुरस्कार घिमिरेले स्वागत मन्तव्य राख्नुभएको थियो भने कार्यक्रमको सञ्चालन सचिव गंगा कुमारी भट्टराईले गर्नुभएको थियो ।
