लुदस, कपिलवस्तु
कम्युनिष्ट आन्दोलनमा लामो समयदेखि सक्रिय नेतृ अम्बिकादेवी शर्मा पौडेलद्वारा लिखित आत्मकथा ‘सङ्कल्पको मेरो यात्रा’ एक कार्यक्रमका बीच विमोचन गरिएको छ। पुस्तकमा पौडेलको राजनीतिक जीवन, कम्युनिष्ट आन्दोलनमा गरेको योगदान, त्याग, संघर्ष र सामाजिक जिम्मेवारीका विभिन्न पाटालाई समेटिएको छ।
पुस्तक विमोचन कार्यक्रममा अखिल नेपाल किसान महासंघ (अफ्फा) का केन्द्रीय उपाध्यक्ष शिव पौडेल, वामपन्थी नेता ठाकुर खनाल, नेकपा (मसाल) का जिल्ला प्रवक्ता माधव भाट क्षेत्री, राष्ट्रिय जनमोर्चाका जिल्ला अध्यक्ष रामप्रसाद बेल्वासे, राष्ट्रिय जनमोर्चाका केन्द्रीय सल्लाहकार दधिराम आचार्य, अखिल नेपाल युवक संघका उपाध्यक्ष अभिशेक आचार्य तथा उद्योग वाणिज्य संघका निवर्तमान अध्यक्ष खिमानन्द पौडेललगायतले संयुक्त रूपमा पुस्तक विमोचन गर्नुभएको थियो।
कार्यक्रममा बोल्दै अफ्फाका केन्द्रीय उपाध्यक्ष शिव पौडेलले अम्बिकादेवी पौडेल कम्युनिष्ट आन्दोलनकी जीवित इतिहासकार भएको बताउनुभयो। उहाँले पौडेलले आफ्नो राजनीतिक जीवनमा भोगेका संघर्ष, त्याग र अनुभवलाई आत्मकथामार्फत सार्वजनिक गर्नु नयाँ पुस्ताका लागि प्रेरणादायी हुने उल्लेख गर्नुभयो।
कम्युनिष्ट आन्दोलनमा लामो समयदेखि सक्रिय रहँदै आउनुभएकी पौडेलको जीवनयात्राले राजनीतिक प्रतिबद्धता, संघर्ष र जिम्मेवारीबोधको महत्व दर्शाउने उहाँको भनाइ थियो। आत्मकथाले विगतका राजनीतिक अनुभव र संघर्षलाई अभिलेखीकरण गर्दै नयाँ पुस्तालाई इतिहास बुझ्नसमेत सहयोग पुग्ने विश्वास व्यक्त गरिएको थियो।
पुस्तकको मन्तव्यमा अम्बिकादेवी पौडेललाई बागलुङ जिल्लाको तत्कालीन दुर्गम क्षेत्र बोहोरागाउँमा जन्मिएर राजनीतिक तथा सामाजिक क्षेत्रमा सक्रिय भूमिका निर्वाह गर्नुभएकी संघर्षशील महिलाका रूपमा चित्रण गरिएको छ। उहाँ अखिल नेपाल महिला संघकी सक्रिय कार्यकर्ता रहनुभएको थियो। पछि बागलुङको बुर्तिबाङ क्षेत्रमा नेपाल कम्युनिष्ट पार्टी (मसाल) को संगठनात्मक अभियानमा सक्रिय रहँदै महिला कार्यकर्ताका रूपमा नेतृत्वदायी भूमिका निर्वाह गर्नुभएको थियो।
राजनीतिक गतिविधिसँगै पारिवारिक जिम्मेवारीसमेत निर्वाह गर्नुभएकी पौडेलले विधवा जीवनमा छोराको पालनपोषण गर्दै इमानदारीपूर्वक जिम्मेवारी पूरा गर्नुभएको र राजनीतिक रूपमा पनि निरन्तर सक्रिय रहनुभएको उल्लेख छ। उहाँले पञ्चायतकालदेखि नै राजनीतिक कार्यक्रम, जनचेतनामूलक अभियान, बैठक, प्रशिक्षण तथा आन्दोलनमा सहभागिता जनाउनुभएको थियो। भारतको गोरखपुरनजिक कुशीनगरमा भएको १५ दिने पार्टी प्रशिक्षण शिविरमा समेत सहभागी हुनुभएको प्रसंग पुस्तकको मन्तव्यमा समेटिएको छ।
पुस्तकको भूमिकामा कम्युनिष्ट आन्दोलनमा लामो समयदेखि सक्रिय रहँदै आएका नेताहरूका संघर्ष र अनुभव नयाँ पुस्ताका लागि महत्वपूर्ण सम्पत्ति भएको उल्लेख गर्दै त्यस्ता अनुभवलाई पुस्तकका रूपमा सुरक्षित राख्नु प्रशंसनीय कार्य भएको बताइएको छ।
कार्यक्रमको अध्यक्षता गर्नुभएकी लेखिका पौडेलले आफ्नो संघर्षपूर्ण जीवनयात्रालाई पुस्तकका रूपमा सार्वजनिक गर्न पाउँदा खुसी व्यक्त गर्नुभयो। पुस्तक प्रकाशनका क्रममा सहयोग गर्ने सम्पूर्ण व्यक्ति तथा शुभेच्छुकप्रति आभार व्यक्त गर्दै उहाँले आफ्नो राजनीतिक जीवनका अनुभव र संघर्षलाई पाठकमाझ ल्याउने प्रयास गरेको बताउनुभयो।
आत्मकथा ‘सङ्कल्पको मेरो यात्रा’ ले व्यक्तिगत जीवनका अनुभवसँगै कम्युनिष्ट आन्दोलनको इतिहास, महिला सहभागिता र राजनीतिक संघर्षका पक्षलाई उजागर गर्ने अपेक्षा गरिएको छ। पुस्तकले नयाँ पुस्तालाई विगतको राजनीतिक यात्राबाट सिक्न र सामाजिक परिवर्तनका लागि प्रतिबद्ध रहन प्रेरणा दिने विश्वास व्यक्त गरिएको छ।
