लुदअ साउन १३, काठमाण्डौ
अमेरिकामा कोरोना भाइरस विरुद्धको खोप परीक्षण सुरु भएको छ ।
३० हजार जनामा गर्न लागिएको यो परीक्षण अहिलेसम्मकै ठूलो हुने बीबीसीले जनाएको छ । विश्वभर कोरोना विरुद्धको खोप बनाउने प्रयास भइरहेका बेला यो खोपको अन्तिम चरणको परीक्षण गर्न लागिएको हो ।
अन्तिम चरणको परीक्षणपछि यसले काम गर्ने वा नगर्ने बारेमा अनुसन्धानकर्ताले अध्ययन गर्ने छन् । अहिलेसम्म विश्वभर १ करोड ६६ हजारभन्दा धेरैमा कोरोना सङ्क्रमण पुष्टि भएकोमा एक करोड दुई लाखभन्दा धेरै निको भइसकेका छन् ।
६ लाख ५५ हजारको भने ज्यान गएको छ । सबैभन्दा धेरै संयुक्त राज्य अमेरिकामा ४४ लाखभन्दा धेरैमा सङ्क्रमण पुष्टि हुँदा १ लाख ५० हजारको ज्यान गएको छ । २१ लाख ३३ हजारभन्दा धेरै निको भएका छन् । यस्तै ब्राजिलमा २४ लाख ४३ हजारभन्दा धेरैमा कोरोना सङ्क्रमण पुष्टि हुँदा साढे ८७ हजारको ज्यान गएको छ ।
यसैगरी भारतमा १४ लाख ८२ हजार जनामा कोरोना पुष्टि हुँदा ज्यान गुमाउनेको संख्या ३३ हजार नाघेको छ ।
