हरि आचार्य कपिलवस्तु, कात्तिक २६
जनता र युगको आवश्यकता अनुसार विकासका कामलाई अगाडि बढाउँदै आएको कपिलवस्तुको बाणगंगा नगरपालिका वडा नम्बर ७ वडा कार्यालयले फेरी प्रभावकारी महिला लक्षित कार्यक्रम सम्पन्न गरेको छ । वडा कार्यालयमा एक कार्यक्रमको आयोजना गरी महिलाहरुको तथ्यांक अनुसार वास्तविक रुपमा ब्यवसाय गरी बसेका २७ जना महिलाहरुलाई सिलाई मेसिन वितरण गरेको वडाकार्यालयले जनाएको छ । यस भन्दा लक्षित वर्गअन्तर्गत बिभिन्न तालिमहरु प्रदान गरिँदै आए पनि तालिममा मात्र सिमित भई परिणाम खासै नआएको भन्दै यस वर्ष प्रोत्साहन स्वरुप सिलाई मेसिन नै वितरण गरिएको वडाध्यक्ष बिष्णु गिरीले जानकारी दिएका छन् ।
आर्थिक बर्ष २०७७/७८ को योजनामध्ये महिला लक्षित कार्यक्रम मध्ये सोहि शिर्षकका लागि छुट्याईएको ३ लाख ५० हजार बजेटबाट उक्त मेसिन वितरण गरिएको वडा सचिव कृष्ण खनालले जानकारी दिएका छन् ।
वडाध्यक्ष गिरिले भौतिक विकास निर्माणले मात्र वडा संमृद्ध नहुने भन्दै वडावासीको जिवनस्तरमा प्रभावकारी टेवा पुग्ने खालका लक्षित कार्यक्रममा जोड दिइएको बताए । उनले पहिलो चरणमा छुटेका सिलाई बुनाई तालिम लिएका, सीप सिक्न नसकेका महिलाहरुलाई आगामि योजनानमा समावेश गरी दोश्रो चरणमा पुनः मेसिन बाँडिने उनले प्रतिवद्धता व्यक्त गरे । वडाध्यक्ष गिरीले यस बर्ष पनि विगतका बर्षमा जस्तै १० वटा योजना सम्पन्न गरिसकिएको र लक्षित वर्गका कार्यक्रम पनि प्रभावकारी रुपमा सञ्चालन भईरहेको बताए ।
कार्यक्रमका प्रमुख अतिथि राष्ट्रिय सभा सदस्य विमला घिमिरे, विशिष्ट अतिथि संविधान सभा सदस्य बलराम अधिकारी, वडा सदस्य, टोल विकास समितिका अध्यक्ष, संचारकर्मी लगायतको उपस्थितीमा महिलाहरुलाई सिलाई मेसिन वितरण गरिएको थियो ।
कार्यक्रममा बोल्दै प्रमुख अतिथि राष्ट्रिय सभा सदस्य घिमिरेले वडाले प्रदान गरेका मेसिनलाई आयआर्जनको श्रोत बनाउन दिदीबहिनीहरुलाई आग्रह गरीन् । उनले वडाले गरेका हरेक लक्षित वर्गका काम निकै प्रभावकारी भएको भन्दै महिलालाई आत्म निर्भर बन्न सहयोग पुग्ने विश्वास ब्यक्त गरीन् । राष्ट्रिय सभा सदस्य घिमिरेले संविधानमा महिला अधिकार सुनिश्चित भएकाले महिलाहरु अब घरमा मात्र नभएर राजनीतिदेखि हरेक क्षेत्रको नेतृत्वमा पुग्नुपर्ने सुझाव पनि दिईन् ।
विशिष्ट अतिथि संविधान सभा सदस्य बलराम अधिकारीले वडाले दिएका मेसिनको सदुपयोग गरी आत्म निर्भर बन्न सुझाव दिंदै सरकारको उदेश्य पनि जनतालाई आत्मनिर्भर र स्वरोजगार बनाउने रहेकोले वडा पनि त्यसतर्फ लागिरहेको उनको भनाई छ ।
अकोरावका जिल्ला अध्यक्ष चन्द्रकान्त न्यौपानेले सिप हुने ब्यक्ति कहिल्यै भोकै बस्न नपर्ने बताए । सिकेको सिपलाई आय आर्जनमा लगाउँदा स्वाबलम्बी बन्न सकिने हुँदा मेसिनको अधिकतम प्रयोग गरी व्यवसायी बन्न उहाँको आग्रह छ ।
सिलाई मेसिन पाएपछि महिलाहरु खुसी व्यक्त गर्दै वडाकार्यालयलाई धन्यवाद दिएका थिए ।
यसअघि पनि वडाले महिला लक्षित कार्यक्रम अन्तर्गत सुत्केरीको लागि पौष्टिक आहार प्रदान, स्वास्थ्य स्वयम् सेविका तथा वाल विकास अध्यापन गराउने महिलाहरुको लागि साइकल वितरण लगायतका कार्यक्रम गर्दै आएको छ ।
वडाध्यक्ष गिरीको अध्यक्षता, वडाका जनप्रतिनिधि, सम्पुर्ण टोल विकास संस्थाका अध्यक्ष, वडावासी, सञ्चारकर्मी लगायतको आतिथ्यता, वडा सदस्य साबित्री थारुको स्वागत मन्तब्य तथा वडा सचिव कृष्ण खनालको संचालनमा कार्यक्रम सम्पन्न भएको हो ।