लुम्बिनी प्रदेशमा बाढीपहिरोबाट बढी प्रभावित

[sharethis-inline-buttons]

बुटवल ,१३ भदौ

पछिल्लो तीन दिनदेखि परेको बर्षाका कारण लुम्बिनी प्रदेशका बिभिन्न जिल्ला बाढीपहिरोबाट बढी प्रभावित बनेको छ । रूपन्देहीको ओमसतिया गाउँपालिका–४ मा रोहिणी खोलाले बगाएर ५५ वर्षीया परमेश्वर कर्णको हिजो दिउँसो मृत्यु भएको हो । रूपन्देहीमै तिनाउ खोलामा आएको बाढीले सम्मरीमाई गाउँपालिका–३ बस्ने २३ वर्षीय बब्लु लोधलाई बगाई बेपत्ता बनाएको प्रहरीले जनाएको छ । लोधको खोकीकार्य भइरहेको रुपन्देही प्रहरीले जनाएको छ । रुपन्देहीकै सिद्धार्थनगर नगरपालिकामा पनि एकजनाको शव फेला परेको छ । यस्तै नवलपरासी पूर्वमा बिहीबार राति पहिरोले पुरिएर बेपत्ता भएका तीन जानाको शव आज फेला परेको छ । नवलपरासी (बर्दघाट सुस्तापूर्व ) नवलपुरको हुप्सेकोट गाउँपालिका ४ को माथिल्लो चार घरेमा अविरल वर्षाका कारण हिजो बिहान २ बजेको समयमा पहिरोमा परि बेपत्ता तीनै जनाको शव आज दिउँसो तीन बजे फेला परेको जिल्ला प्रहरी कार्यालय नवलपरासी पूर्व नवलपुरका सूचना अधिकारी मधुसुदन सिंहले बताउनुभयो । पहिरोमा पुरिएका एकै घरका तीन जना हस्तबहादुर पुलामीका श्रीमती ४० वर्षीया धनमाया पुलामी, नातिनीहरू ७ वर्षीया भूमिसरा पुलामी र ६ वर्षीया देउमाया पुलामी राति सुतिरहेको समयमा एक्कासि आएको पहिरोमा परि बेपत्ता भएका थिए । हस्तबहादुर पुलामीको भने घाइते अवस्थामा उद्धार गरिएको थियो । यस्तै नवलपरासी पश्चिममा मृत्यु हुनेमा रामग्राम नगरपालिका–१८ पम्फापुरका विनोद प्यासी र उहाँका १३ वर्षीय छोरा प्रदिप प्यासी हुनुहुन्छ । घरमा पहिरो गएपछि छिमेकीको घरमा जाने बेला पानीले डुबेर बाबुछोराको मृत्यु भएको प्रहरीले जनाएको छ । जिल्ला प्रहरी प्रमुख प्रहरी उपरीक्षक मनोजकुमार यादवकाअनुसार घट्ना हिजो बिहानको हो । यस्तै सुनवल नगरपालिका– १४ का १० वर्षीया एलिसा तामाङ बेपत्ता हुनुभएको छ । उहाँको खोजीकार्य भइरहेको यादवले जानकारी दिनुभयो । यस्तै मलामी गएका दाङको दंगीशरण गाउँपालिका–१ का ५० वर्षीय बामदेव देवकोटाको बबई नदीले बगाउँदा मृत्यु भएको छ । हिजो बिहान मलामी गएको बेला नुहाउने क्रममा उहाँलाई बबई नदीले बगाउँदा मृत्यु भएको प्रहरीले जनाएको छ ।


प्रकाशित : २०७८ भाद्र १३, आईतवार ०८:०४