काठमाडौँ ,भदौँ १३
साताको पहिलो कारोबार दिन आइतबार नेप्से परिसूचक ४९।१८ अङ्कले घटेर ३ हजार ४४।८७ बिन्दुमा झरेको छ । गत साताको अन्तिम कारोबार दिन बिहीबार १७।६० अङ्कले बढेको बजार ३ हजार ९४।०५ बिन्दुमा पुगेको बजार आज भने ओरालो लागेको हो ।आजको दिन ठूला तथा बलिया कम्पनीको मापक सेन्सेटिभ इन्डेक्स समेत ८।५९ अङ्कले घटेर ५६२।८६ बिन्दुमा झरेको छ ।
यो दिन कारोबारमा आएका वित्त समूहबाहेक अधिकांश समूहको परिसूचक राताम्मे बनेको छ । वित्त समूहको परिसूचक ०।६८ प्रतिशतले बढ्दा हाइड्रो समूहको परिसूचक सर्वाधिक बढी २।४२ प्रतिशतले घटेको छ । त्यसैगरी बैंकिङ उपसमूहको परिसूचक १।५० प्रतिशत, निर्जीबन बीमा, बीमा, लघुवित्त व्यापारिक लगायत अधिकांश समूहको परिसूचक आज घटेको हो ।
घटेको बजारमा आज दुई ओटा कम्पनीको शेयरमूल्य १० प्रतिशतले बृद्धि भएको छ । यो दिन नारायणी डेभलपमेन्ट बैंक र खानीखोला हाइड्रो पावरको शेयरमूल्य १० प्रतिशतले बढेको हो । आज रुरु जलविद्युत परियोजनाका लगानीकर्ताहरुले सर्वाधिक बढी गुमाएका छन् । उक्त कम्पनीको शेयरमूल्यमा १० प्रतिशतको नेगेटिभ सर्किट लागेको हो ।
आइतबार कारोबार अवधिभर २२७ ओटा कम्पनीको २ करोड ४८ लाख ८८ हजार ३१३ कित्ता शेयर खरिदबिक्री हुँदा १५ अर्ब ६५ करोड १२ लाख ४४ हजार रुपैयाँ बराबरको कारोबार भएको छ । सोमध्येमा आज अरुण भ्याली हाइड्रो पावर डेभलपमेन्ट कम्पनीको कारोबार रकम सर्वाधिक बढी भएको देखिएको छ । उक्त कम्पनीको आज एक अर्ब ३१ करोड ८३ लाख ४४ हजार रुपैयाँ बराबरको शेयर कारोबार भएको हो ।
