होटल व्यवसायी संघ कपिलवस्तुले मेची महाकाली यात्रा गर्ने
लुदअ कपिलवस्तु, माघ २९
होटल तथा रेष्टुरेन्ट व्यवसायी संघ कपिलवस्तुले मेची महाकाली यात्रा गर्ने भएको छ । कपिलवस्तुमा भएका धार्मिक तथा पर्यटकीय स्थलको देशभर प्रचार गरी लाखौँ पर्यटक भित्र्याई जिल्लाको पर्यटन प्रवद्धन गर्न भन्दै संघले मेची महाकाली यात्रा गर्न लागेको हो । यस विषयमा जिल्ला समन्वय समितिसंग छलफल गरी १० पालिका प्रमुखसंग छलफल भई अभियान अगाडी बढेको अध्यक्ष गोपाल क्षेत्रीले जानकारी दिए ।
कपिलवस्तुमा बुद्धले ३० बर्ष विताएको तिलौराकोट, जगदीशपुरताल, मधुवनधाम, कपिलधाम, कैलाश आश्रम लगायत दर्जनबढी पर्यटकीय स्थल छन् । विश्वमै शान्तिको सन्देश कपिलवस्तुबाट प्रवाहित भएको छ । उहाँका अनुसार सबैभन्दा पहिले कपिलवस्तुका धार्मिक र पर्यटकीय स्थल, यहाँको कला, संस्कृति र भेषभुषा आदिको परिचय हुने गरी सानो वृत्त चित्र बनाइने छ ।
त्यसको लागि स्थानमा पुगेर भिडियो छायांकन गर्न लागिएको पनि संघका उपाध्यक्ष रेशम ढकालले बताउनु भयो । मुलुकका पूर्वदेखि पश्चिममा भएका महत्वपूर्ण स्थानमा पुगी त्यहाँका सरोकारवालासंग छलफल गर्ने, अन्तरक्रिया गर्ने र कपिलवस्तुको परिचय समेटिएको वृत्त चित्र प्रदर्शन गरिने छ ।
