हरि आचार्य कपिलवस्तु, चैत १०
दिगो तथा मर्यादित सामाजिक आर्थिक शसक्तिकरणका लागि हाम्रो पेशा भन्ने मुल नाराका साथ होटेल तथा रेष्टुरेण्ट ब्यवसायी संघ कपिलवस्तुको मेची-महाकाली अभियान कपिलवस्तु आईपुगेको छ । जिल्लाको चार नम्बर जितपुर चोकमा उक्त अभियानलाई स्वागत गरिएको हो । कोरोनाको कारण होटेल ब्यावसायी धरासयी भएपछी जिल्लामा पर्यटक भित्र्याउन सुरु भएको अभियान पुर्व मेची लगायत विभिन्न जिल्लामा पुगेर गृहजिल्ला कपिलवस्तु आईपुगेको हो ।
धार्मिक पुरातात्विक र पर्यटकीय स्थलले भरिपुर्ण कपिलवस्तुको पहिचान, पर्यटन प्रवद्र्धन र विकास गर्ने उद्देश्यले मेचीमहाकाली अभियान गरिएको हो । सो अभियानलाई यस क्षेत्रका होटल व्यवसायी, बाणगंगाका जनप्रतिनिधि, पत्रकार महासंघ कपिलवस्तु लगायतले एक कार्यक्रमको आयोजना गरि उक्त अभियानलाई स्वागत गरिएको हो ।
कार्यक्रमका प्रमुख अतिथि प्रतिनिधि सभा सांसद अतहर कमाल मुसलवानले कपिलवस्तु जिल्ला पर्यटकीय सम्पदाले भरिपुर्ण रहेकाले यहाँका ऐतिहासिक र पुरातात्विक सम्पदाको देशैभर प्रदर्शन गर्न आवश्यक रहेको बताए । उनले मेचीमहाकाली अभियानको सफलताको शुभकामना दिंदै सक्दो सहयोग गर्ने बताए ।
त्यस्तै प्रदेश सांसद बिष्णु पन्थीले कपिलवस्तुमा पनि होटल व्यवसाय क्रमशः फस्टाउदै गएको बताए । कार्यक्रमका विशिष्ट अतिथि समेत रहेका सांसद पन्थीले कपिलवस्तुलाई चिनाउन गरिएको यो अभियानले ‘नेपाल देख्न र बुझ्न, जानुपर्छ कपिलवस्तु घुम्न’ भन्ने कथनलाई प्रमाणित गरेको बताए ।
संघका अध्यक्ष गोपाल बहादुर खत्रीले अभियानको औचियत्य माथी प्रकाश पार्दै कपिलवस्तुको परिचय बताए । अध्यक्ष खत्रीले अब कपिलवस्तु पर्यटनको ओईरो लाग्ने बताए । उनले कोरोनाका कारण थला परेका होटल व्यवसायीलाई माथि उठाउनका लागि विभिन्न प्रदेश तथा जिल्लामा ज्ञापन पत्र बुझाएको बताए । उनले अभियानलाई स्वागत गर्ने सम्पुर्णलाई धन्यवाद व्यक्त गर्दै अब पश्चिम तर्फ यात्रा गर्ने बताए ।
स्वागत कार्यक्रममा बाणगंगा नगरपालिका वडा नं. ४ का वडाध्यक्ष गणेश बहादुर क्षेत्री, १ का अध्यक्ष वालकुमारी पन्त अधिकारी, कपिलवस्तु उद्योग वाणिज्य संघका अध्यक्ष दोलकराम घिमिरे, पत्रकार महासंघ कपिलवस्तु शाखा अध्यक्ष डिलाराम भुसाल लगायतले मन्तब्य राख्दै अभियान सफलताको शुभकामना दिए ।
कार्यक्रममा टोलिले भिभिन्न जिल्लाका प्रतिनिधिहरुलाइ कपिलवस्तुका पर्यटन प्रबर्द्धन हुने खालका झलक समेटिएका मायाको चिनो, ब्रसर र पम्प्लेट बितरण गरिरहेको छ । कपिलवस्तुको बुद्धभूमिमा थारु महिलाले बुनेका ढकियाको देशभर विक्रि भई करिव ५० हजार कारोवार भईसकेको बताईएको छ । यसअघि टोलिले बाग्मती, गण्डकी, प्रदेश १ र प्रदेश २ मा कार्यक्रम गरिसकेको छ । सबै ठाउँमा अभियानको प्रसंसा गरेका छन । चैत्र ३ गतेदेखी सुरु भएको मेची महाकाली अभियान पश्चिमको महाकाली पुगेर समापन हुने अध्यक्ष खत्रीले जानकारी दिए ।
अभियानका प्रेस संयोजक चन्द्रकान्त न्यौपानेको संचालन रहेको कार्यक्रममा बरिस्ठ उपाध्यक्ष लेख्नाथ घर्ती, उपाध्यक्ष रेशम ढकाल, सचिब शिव राज सापकोटा, कोषाध्यक्ष पदम ढकाल लगायतको उपस्थिती रहेको थियो ।
