तिलोत्तमा चैत्र २९

रुपन्देहीको तिलोत्तमा नगरपालिकाले नगर भित्र रहेका ५ वटा सामुदायिक बिद्यालयहरुलाई बस हस्तान्तरण गरेको छ । शिक्षामा लगानी बढाएको नगरपालिकाले सामुदायिक बिद्यालयहरुमा बिद्यार्थीको आकर्षण बढाउन बस प्रदान गरेको हो ।

चालु आर्थिक बर्षमा ६ वटा बिद्यालयलाई बस प्रदान गर्न छुट्टयाएको बजेटबाट तिलोत्तमाको श्री पशुपति माध्यमिक विद्यालय, श्री शिवपूर माध्यमिक विद्यालय, श्री जनजागृति माध्यमिक विद्यालय, श्री जनता माध्यमिक विद्यालय र श्री जनभावना माध्यमिक विद्यालयलाई बस प्रदान गरिएको छ । अनुदान प्राप्त गिर्वाण साधारण तथा संस्कृत माविले पनि छिट्टै बस खरिद गर्नेछ । नगरपालिकाबाट १० लाख अनुदान पाएका सामुदायिक विद्यालयले बस २० लाख ९५ हजार रुपैयामा विद्यालयमा वस खरिद गरेका हुन ।

तिलोत्तमा नगरपालिकाले बिगत वर्षहरु देखी नै शिक्षा क्षेत्रमा लगानी बढाउँदै आएकोमा यस आर्थिक वर्षमा ६ वटा विद्यालयलाई बस प्रदान गर्न छुट्टयाईएको तिलोत्तमा नगरपालिकाका उपसचिव गंगाराम आचार्यले जानकारी दिए । सोही अनुसार बढी विद्यार्थी संख्या भएका र यातायातका साधन नभएका बिद्यालयलाई छनौटमा राखी बस प्रदान गरिएको उनलेजानकारी दिए । उनले नगरपालिकामा रहेका अन्य विद्यालयलाई पनि यसै गरि नै बस हस्तान्तरण गरिने जानकारी दिए ।

तिलोत्तमाका विद्यालयका विद्यार्थीहरु टाढाबाट अध्ययनको लागी आउने र अभिभावकको ईच्छा पनि आफ्ना बालबालिकाहरु बसबाट जानु पर्ने इच्छा अब पुरा हुने भएकोमा शिक्षकहरु पनि हर्षित भएका छन् । बस बुझ्न आएका शिवपुर माध्यमिक विद्यालयका सहायक प्रधान अध्यापक केशव राज भण्डारीले यसले विद्यार्थीहरु विद्यालय प्रति थप आकर्षित हुने करामा जोड दिए ।
घर अगाडीबाट नै संस्थागत विद्यालयहरुले बसबाट विद्यार्थी ओसारेको देख्दा अभिभावकलाई आफ्ना बालबालिका पनि बसबाट विद्यालय जान पाउन भनि चाहना राख्नु स्वाभाविक भएको तिलोत्तमा नगरपालिकाका प्रमुख बासुदेव घिमिरेको बुझाई रहेको छ । यहि कुरालाई मनन गर्दै नगरपालिकाले पनि बसमा लगानी गरेको उनले बताए ।
बस खरिद गर्नु भन्दा पनि यसलाई सञ्चालन र यसको रेखदेख गर्नु चुनौतीपूर्ण रहेकोले यस तर्फ ध्यान दिन उनले विद्यालयहरुलाई उनले अनरोध गरे । नगरपालिकाले भौतिक पूर्वाधारमा मात्र नभई शिक्षाको गुणस्तर बढाउनको पनि प्रयाप्त लगानी गरी लागि पर्ने करामा पनि जोड दिए ।