लुदअ बैशाख ५, काठमाण्डौ
पालिका चुनावका लागि उम्मेदवारी दर्ता गर्ने दिन नजिकिँदै गर्दा दलहरुको व्यस्तता बढेको छ । उम्मेदवार छनोटबारे छलफल गर्न सत्ता गठबन्धनको बैठक आज पनि बस्दैछ ।
आज बेलुकीसम्म ६ महानगर र ११ उपमहानगरपालिकाको बाँडफाँट टुङ्गो लगाउने गठबन्धनका नेताहरुले दाबी गरेका छन् । तर गठबन्धनका पाँचवटै दलले आआफ्ना अडान र दाबी छोडेका छैनन् ।
सत्ता गठबन्धनमा सहभागी दलहरुले महानगर र उपमहानगरपालिकामा आ–आफ्नो दाबी गरेका छन् । नेपाली कांग्रेसले काठमाण्डौ, ललितपुर, विराटनगर महानगरपालिकाको प्रमुखमा दाबी गरेको छ ।
यस्तै, माओवादी केन्द्रले भरतपुर, एकीकृत समाजवादीले पोखरा र जनता समाजवादी पार्टीले वीरगञ्ज महानगरपालिकामा दाबी गरेको छ।
११ उपमहानगरपालिकामध्ये कांग्रेसले बुटवल, जनकपुर, तुलसीपुर, कलैया, घोराही, धनगढी, हेटौँडा लगायतमा दाबी गरेको छ । माओवादी केन्द्रले घोराही, जितपुर सिमरा, हेटौडा र धरान उपमहानगरपालिकामा दाबी गरेको छ ।
एकीकृत समाजवादीले तुलसीपुर, हेटौँडा र इटहरी तथा जसपाले नेपालगञ्ज उपमहानगरपालिकामा मात्रै दाबी गरेको छ । गठबन्धनमा भएका पाँच दलमध्ये छ वटै महानगरपालिकामा कांग्रेसको मतभार धेरै छ । त्यहीकारण कांग्रेसका स्थानीय कार्यसमितिले अल्पमतको नेतृत्व स्वीकार्न नसकिने अडान लिएका छन् ।
गठबन्धनमा रहेका दलका आआफ्नै दाबी र अडानले उम्मेदवार टुङ्ग्याउन सकस भएको छ । निर्वाचन आयोगले आउँदो १० र ११ गते उम्मेदवारी मनोनयनको दिन तोकेको छ ।
एमाले सचिवालय बैठक आज
चुनावी तयारीको विषयमा छलफल गर्न नेकपा एमालेले केन्द्रीय सचिवालय बैठक बोलाएको छ । आज बेलुकीपख तुलसीलाल स्मृति भवन च्यासलमा बस्ने बैठकमा घोषणापत्र र उम्मेदवार छनोटबारे छलफल हुने प्रचार विभाग उपप्रमुख विष्णु रिजालले जानकारी दिनुभयो ।
केन्द्रले टुङ्गो लगाउने ६ महानगर र ११ उपमहानगरपालिका सबैमा एमालेले उम्मेदवार सिफारिस गरिसकेको छ । सिफारिस भएका उम्मेदवारको समीक्षा र बाँकी रहेकामा कसलाई पठाउनेबारे बैठकमा छलफल हुनेछ ।
यसैगरी कम्युनिस्ट दिवसका दिन वैशाख ९ गते सार्वजनिक गरिने घोषणापत्रमाथि पनि छलफल गरेर अन्तिम रुप दिइने एमालेले जनाएको छ।
