लुदअ, कपिलवस्तु
गत २०७८ साल वैशाख १ गते देखि चैत्र मसान्तसम्म एक वर्षको अवधिमा लुम्बिनी प्रदेशका १२ वटा जिल्ला प्रहरी कार्यालयहरूमा कूल ४११ वटा बलात्कार घटनाका उजुरी परेको तथ्याङ्क प्राप्त भएको छ । प्रदेश प्रहरी कार्यालय दाङका प्रहरी उपरीक्षक केदार रजौरेले उपलब्ध गराएको विवरण अनुसार त्यस अवधिमा बाँकेमा ६३ वटा बलात्कार घटनाका उजुरी परेका छन् । त्यस्तै बर्दियामा ५७ वटा, दाङमा ८३ वटा रोल्पामा १८ वटा, प्युठानमा २० वटा, रुकुम पूर्वमा ४ वटा, कपिलवस्तुमा ३८ वटा, रुपन्देहीमा ६८ वटा, नवलपरासी पश्चिममा १९ वटा, पाल्पामा २१ वटा, गुल्मीमा १३ वटा र अर्घाखाँचीमा ७ वटा बलात्कार घटनाका उजुरी परेका हुन् ।
बलात्कृत हुनेहरूमा १६ वर्ष मुनिका १७३ जना बालिका रहेका छन् । १६ देखि १८ वर्ष मुनिका ९० जना रहेका छन् । १८ देखि २५ वर्षमुनिका ७२ जना रहेका छन् । २६ देखि ३५ वर्षका ३६ जना रहेका छन् । २६ देखि ४५ वर्षका २५ जना रहेका छन् । ४६ देखि ६० वर्ष मुनिका १३ जना र ६० वर्षदेखि माथिका २ जना महिला बलात्कृत भएका छन् ।
सबैभन्दा कम उमेरकी ३ वर्षीया बालिका बर्दियामा एक जना र पाल्पामा एक जना गरी दुई जना बालिका यौन हिंसाको शिकार भएको प्रहरी उपरीक्षक रजौरेले जानकारी दिए । १० मङ्सिर २०७८ मा वाणगंगा नगरपालिका–१० सोनापुरस्थित ६० वर्षीया यशोदा लोनियालाई देवर पर्ने शम्भु लोनियाले हत्या गरेका थिए । भाउजूले पहिलो पटक शारीरिक सम्पर्क राख्न दिएको र दोस्रो पटक नमाने पछि गला दबाएर हत्या गरेका ४० वर्षीय लोनियाले ५ फागुनमा पक्राउ पछि स्वीकार गरे ।
१ असार २०७८ मा कपिलवस्तुको वाणगंगा नगरपालिका –८ वोर्डगाउँकी २४ वर्षीया सुस्मिता थापा हेटौँडा नगरपालिका–४ सूर्यचोकस्थित घरमा बीभत्स हत्या गरिएको अवस्थामा फेला परिन् । ससुरा थापा, सासू तुल्सा थापा, नन्द सीता थापा र आमाजू दुर्गा थापा हत्या घटनामा संलग्न रहेको भन्दै प्रहरीले सार्वजनिक गरेको थियो । श्रीमान्को मृत्यु पश्चात् ४० लाखभन्दा बढी रकम सुस्मितालाई पाउन बाट वञ्चित गर्न समेत हत्या गरिएको कुरा प्रहरीले खुलाएको थियो ।
