शुद्धोधनका जनप्रतिनिधिसंग कर्मचारी सहमत, कामकाज सुचारु

[sharethis-inline-buttons]

हरि आचार्य, कपिलवस्तु
कपिलवस्तुको शुद्धोधन गाउँपालिकामा प्राविधिक शाखामा कार्यरत कर्मचारीहरुले पेन डाउन आन्दोलन गर्ने विज्ञप्ति जारी गरेसंगै गाउँपालिकाले छलफल गरी विभिन्न विषयमा समझदारी कायम गरिएको छ । विहान ९ बजे देखि जनप्रतिनिधि र कर्मचारी बिच निरन्तर चलेको छलफलबाट समझदारी भएको हो ।

कर्मचारीहरुले बजेट निकासाको अन्तिम समयमा आएर उपभोक्ता समिति तथा जनप्रतिनिधिहरुबाट निर्माण व्यवसायीको पक्षपोषण गर्दै डर, धम्की तथा गालीगलौज गरि नभएको कामको विल उठान गर्न दवाव दिएको भन्दै सोको विरोध स्वरुप कामकाज ठप्प पार्ने चेतावनी समेत दिएका थिए ।

यो संगै शुद्धोधन गाउँपालिका अध्यक्ष कमलेश शरण चौधरीको संयोजकत्व, उपाध्यक्ष होम प्रकाश चौधरी (कुर्मी), वडा अध्यक्ष तिलकराम यादव, प्रमुख प्रशासकीय अधिकृत कृष्ण प्रसाद ज्ञवाली लगायत जनप्रतिनिधि र कर्मचारी बिच समझदारी भएको हो ।

छलफलमा सामग्री लेबर मिस्त्री कार्यस्थलमा जुराएर प्राविधिक कर्मचारीलाई बोलाउने, फोन गर्ने होइन पहिले प्राविधिक कर्मचारीसंग समय निर्धारण गरेर मात्र सामग्री लेबर मिस्त्री बोलाउने व्यवस्था मिलाईन, उपभोक्ता समितिको फाईल कार्यालयमा पेश गर्दाको बखत उपभोक्ता समितिका पदाधिकारी समेत कार्यालयमा उपस्थित गराइने, सहजीकरणका लागि कोही प्रतिनिधि वा अन्य कोई व्यक्ति आउनु पर्ने भएमा सभ्य तरीकाले उपस्थित हुन सक्ने व्यवस्था मिलाइने समझदारी भएको छ ।

त्यस्तै योजना अनुगमनका सम्बन्धमा अनुगमन समितिका संयोजक वा गाउँपालिका अध्यक्ष र प्राविधिक कर्मचारीको अनिवार्य उपस्थिती गराइने, उपभोक्ता समितिलाई खरीद कार्य गर्दा सम्बन्धित फर्म, सप्लायरको कर चुक्ता भएको यकीन गरेर मात्र खरीद कार्य गर्नका लागि सबैले आ–आफ्नो तहबाट सञ्चार गर्ने गराइने, पदाधिकारी तथा कर्मचारीहरू सबैले सभ्य र अनुशाशित आचरण अवलम्बन गर्ने, नेपालको संविधानको सिद्धान्त, समन्वय सहकार्य र सहअस्तित्वको सिद्धान्तलाई आत्मसात गर्दै शान्त, सु–सज्जित र सुरक्षित कार्य वातावरण सृजना गर्ने प्रतिबद्धता जाहेर समेत गरिएको छ ।

त्यस्तै योजना कार्यान्वयन तथा गुणस्तरका सम्बन्धमा सम्बधित कर्मचारीसंग विश्वस्त भएर मात्र सार्वजनिक अभिव्यक्ति सार्वजनिकीकरण गरिने, हालसम्मको सम्पूर्ण जटिल अवस्था, मनमा रहेका द्विविधा, कार्यालय स्थलमा भएको व्यवहारबारे व्यापक छलफल गर्ने वातावरणमा सक्रिय सहभागिता जनाई निष्कर्षमा पुग्ने अवस्थामा सहयोग गर्ने सम्पूर्ण जनप्रतिनिधि, कर्मचारी तथा सुरक्षाकर्मीलाई हार्दिक धन्यवाद गरिएको छ ।

त्यस्तै आगामी दिनमा यस प्रकारको परिस्थिति सृजना दोहोरीयमा गाउँपालिका अध्यक्ष समक्ष अवस्थाको बारेमा जानकारी गराउने र सो समस्या समाधानका लागि अध्यक्षले सम्पूर्ण जिम्मेवारी लिने प्रतिबद्धताका आधारमा आजैका दिन मिति २०८० असार ७ गते ४ः०० बजेदेखि कार्य प्रारम्भ गर्ने व्यवस्था मिलाउने समझदारी गरिएको छ ।


प्रकाशित : २०८० असार ७, बिहीबार १७:४६