लुदस, कपिलवस्तु
कपिलवस्तुको बाणगंगा नगरपालिका वडा नम्बर ४ ठाकुरापुरस्थित युनाइटेड नेश्नल हस्पिटल थप प्रविधिमय बन्दै गएको छ । विशेषज्ञ सेवासहित पश्चिम नेपालमा उत्कृष्ट सेवा दिँदै आइरहेको अस्पतालले अस्पतालबारेका जिज्ञासा र गुनासा सुनुवाई गर्न प्रविधिको प्रयोग सुरुवात गरेको हो ।
अब अस्पतालप्रति आफूलाई लागेको जिज्ञासा क्यूआर कोड स्क्यान गरेर राख्न पाइने छ । यससम्बन्धि अस्पतालले आफ्नो फेसबुक पेजमार्फत् सबैलाई जानकारी दिएको छ ।
अस्पतालका कार्यकारी निर्देशक सुन्दर आचार्यले सबै कुरा अब मोबाइल र कम्यूटरमार्फत् हुन थालेकाले आफूहरु पनि अपग्रेड भएको लुम्बिनी दर्पणलाई बताए । क्यूआरकोड स्क्यान गरेपछि दिइएका निर्देशनको आधारमा आफ्ना सुझाव, सल्लाहा, गुनासा, राम्रा सबै कुरा राख्न सकिने आचार्यले बताए ।
अस्पतालका अध्यक्ष मुनाराम चालिसेले अस्पताल अब शिक्षण अस्पतालको रुपमा विकास हुँदै गरेको जानकारी दिँदै लुम्बिनी प्रदेशकै उत्कृष्ट बनाउने गरी अघि बढेको बताए ।
युनाइटेड अस्पताल सहकारी मोडलबाट संचालित कपिलवस्तु जिल्लाकै एक मात्र अस्पताल हो । युनाईटेड सहकारीमार्फत् अहिले अस्पतालले गतिविधि गरिरहेको छ ।
