नेपाल चिकित्सक संघले आफ्ना मागमा सरकार गम्भीर नभए सरकारलाई चिकित्सकको लाइसेन्स बुझाउने चेतावनी दिएको छ । राज्यले अझै मागको सुनुवाइ नगरे सम्बन्धित निकायमा चिकित्सकको लाइसेन्स बुझाउने संघको धम्की छ ।
राज्यले स्वास्थ्य क्षेत्रलाई सेवा नभइ उद्योग बनाउन खोजेको संघको आरोप छ । संघले मंगलबार आकस्मिकबाहेकका उपचार सेवा बन्द गरेर प्रदर्शन गरेको छ ।
उपभोक्ता संरक्षण ऐन २०७५ को दफा २ मा विभिन्न सेवाहरूको परिभाषा गर्ने क्रममा स्वास्थ्य र चिकित्सकीय सेवाका साथै अन्य सेवालाई पनि समावेश गरिएकोमा त्यसलाई संशोधन गर्नुपर्ने संघको माग छ ।
देशभरका अस्पतालमा आकस्मिक बाहेकका उपचार सेवा बन्द हुँदा विरामीलाई समस्या भएको छ । माइतिघर मण्डलमा प्रदर्शनमा उत्रिएका चिकित्सकले नेपाल मेडिकल काउन्सिल ऐन २०२० मा निर्दिष्ट प्रावधानअनुसार नेपालमा चिकित्सकीय अभ्यासलाई नियमन गर्ने स्पष्ट क्षेत्राधिकार काउन्सिलको रहेको उल्लेख गरेका छन् ।
संघका अध्यक्ष डा. अनील विक्रम कार्कीले काउन्सिलको क्षेत्राधिकारको विषयमा अदालतले हस्तक्षेप गर्दा चिकित्सकहरू काममा फर्कने अवस्था नरहेको बताए ।
