नेपाल विद्युत् प्राधिकरणका कार्यकारी निर्देशक हितेन्द्रदेव शाक्यको १०० दिनको कार्यकाल पूरा हुँदा पनि विद्युत् ट्रिपिङको समस्या ज्यूँका त्यूँ छ, जसले जनमानसमा आक्रोश थप बढाएको छ। कुलमान घिसिङको स्थानमा शाक्यको नियुक्तिसँगै बढेको यो समस्याले उनको ‘हनिमुन पिरियड’ सकिए पनि उपभोक्ताले सुधारको अनुभूति गर्न पाएका छैनन्।
शाक्यले कार्यकारी निर्देशकको जिम्मेवारी सम्हालेपछि प्रणालीमा सुधार आएको दाबी गरे पनि जनताले त्यसको अनुभव गर्न सकेका छैनन्। विशेषगरी, कुलमान घिसिङलाई हटाएर शाक्यलाई ल्याइएपछि सरकारप्रति नै नागरिकमा असन्तुष्टि बढेको थियो।
ट्रिपिङले दैनिकी कष्टकर
कार्यभार सम्हालेको केही समयमै, जेठ १ गते धनुषाको ढल्केवरमा आएको चक्रवातले प्राधिकरणको प्रणाली साढे २ घण्टासम्म डाउन गराएपछि शाक्यले पत्रकार सम्मेलन गरी लोडसेडिङ नहुने दाबी गरेका थिए। तर, हावाहुरीका कारण ढल्केवर-मुजफ्फरपुर ४०० केभी डबल सर्किट लाइनमा समस्या आउँदा बेलुका साढे २ घण्टा विद्युत् अवरुद्ध भएको थियो। यस घटनापछि सामाजिक सञ्जालमा उनीविरुद्ध चर्को आलोचना भएपछि उनले सफाइ दिनुपरेको थियो।
कुनै पनि नयाँ नेतृत्वलाई संस्था र कर्मचारीबारे बुझ्न सय दिन पर्याप्त मानिन्छ। तर, शाक्यको आगमनपछि पनि ट्रिपिङको समस्या झनै बढेको छ। प्रणालीमा लोड अत्यधिक बढ्नु वा घट्नु, सर्ट सर्किट, जमिनमा लाग्नु, वा लाइनमा खराबी आउनुलाई ट्रिपिङ भनिन्छ। प्राधिकरणको जडित क्षमता ३६०० मेगावाटभन्दा माथि भए पनि खपत कम हुँदा पनि उपभोक्ताले ट्रिपिङको समस्या भोगिरहेका छन्।
शाक्यले “प्रणाली सुदृढीकरण र ट्रिपिङ समस्या समाधानका लागि सञ्जाल सुदृढीकरण र ऊर्जा सुरक्षाका उपायहरू अपनाइ ग्राहकवर्गसम्म विश्वसनीय विद्युत् पुर्याउन आवश्यक कार्य अगाडि बढाइएको छ” भन्दै “साइफाइ” र “सेडी” जस्ता अन्तर्राष्ट्रिय मानक प्रयोग गरी लाइन ट्रिपिङमा सुधार ल्याउने बताएका छन्।
उद्योगी-व्यवसायी पनि असन्तुष्ट
तराई क्षेत्रमा अझै पनि विद्युत् अनियमितताले दैनिकी कष्टकर बनाएको छ। नेपाल उद्योग वाणिज्य महासंघ लुम्बिनी प्रदेशका अध्यक्ष कृष्णप्रसाद शर्माले रुपन्देही र भैरहवा क्षेत्रमा अझै विद्युत् अनियमित रहेको बताएका छन्। उनले भने, “पहिलाको जस्तो समस्या त छैन। उद्योग पनि पूर्ण क्षमतामा चलेका छैनन्। समस्या अझै छ।” यस्तै समस्या मधेश प्रदेश र कोसी प्रदेशका उद्योगीहरूले पनि भोगिरहेका छन्।
मोफसलमा मात्र होइन, राजधानीमै पनि ‘ट्रिपिङ’ले समस्या निम्त्याएको छ। मध्य वर्षामा समेत प्राधिकरणले ‘लोड म्यानेज’ गर्न नसक्नुमा नेतृत्वको समस्या रहेको प्राधिकरणकै कर्मचारीहरू स्वीकार गर्छन्। एक कर्मचारीका अनुसार, “एमडी सर मान्छे सोझो हो। उनी विशुद्ध ‘टेक्निकल’ मान्छे हो। उनलाई संस्था कसरी ‘रन’ गराउने हो भन्ने जानकारी छैन।” ती कर्मचारीले पछिल्लो समय शाक्यको कार्यशैली हेर्दा प्राधिकरण उनको हातबाट चलिरहेको छ भन्नेमा शंका व्यक्त गरे।
मन्त्रीसँग सम्बन्धमा दरार
पछिल्लो समय शाक्यको ऊर्जा मन्त्री दीपक खड्कासँग पनि सम्बन्ध बिग्रँदै गएको छ। मन्त्रीले भनेका विषयमा शाक्यले निर्णय नगरेका कारण सम्बन्धमा दरार आएको हो। असार २२ गतेभित्र प्राधिकरणका विभिन्न कार्यालय प्रमुखहरूको सरुवा गर्न मन्त्री खड्काले कार्यकारी निर्देशक शाक्यलाई निर्देशन दिएका थिए, तर उक्त विषयमा कुरा नमिलेको स्रोत बताउँछ। खड्का र शाक्यको सम्बन्धमा तेस्रो पक्ष हावी हुँदै गएको स्रोतको दाबी छ।
मंगलबारको पत्रकार सम्मेलनमा पनि मन्त्रीसँगको सम्बन्धका विषयमा पत्रकारले सोधेको प्रश्नमा शाक्यले ‘अनुमान गलत भन्न मिल्दैन’ भनेका थिए। स्रोतका अनुसार, “बोर्ड बैठकमा जे जसरी कुरा उठ्यो। त्यो देखाउने दाँत मात्रै हो। कुन पक्षलाई कसरी संस्थामा प्रभाव बढाउन सकिन्छ त्यहीअनुरुप लागि परेका छन्।” स्रोतले राज्यका सबै क्षेत्र कसरी चलिरहेको छ भन्ने स्पष्ट रहेको र निश्चित उद्देश्यका लागि प्रयोग भएका व्यक्तिहरू राजीनामा समेत दिन सक्ने अवस्थामा नरहेको टिप्पणी गरेको छ।
