विश्वका धेरै देशमा चीन र चिनियाँ नेता सी चिनफिङप्रतिको दृष्टिकोणमा सुधार भइरहेको पाइएको छ । तर, अमेरिका र अमेरिकी राष्ट्रपति डोनाल्ड ट्रम्पप्रतिको दृष्टिकोणमा कमी आइरहेको देखिएको छ ।
प्यू रिसर्च सेन्टरले करिब दुई दर्जन देशमा गरेको नयाँ सर्वेक्षणले दुवै महाशक्ति देश र तिनका नेताहरूप्रति अन्तर्राष्ट्रिय दृष्टिकोणमा सन् २०२० को तुलनामा लगातार अन्तर कम हुँदै गएको देखाएको हो ।
मंगलबार जारी गरिएको सर्वेक्षणमा जो बाइडनको कार्यकालमा उनको र चिनियाँ राष्ट्रपतिप्रति विश्वव्यापी दृष्टिकोणमा निकै अन्तर भए पनि अब ट्रम्पको सत्तामा आगमन र विशेष गरी ट्यारिफ मुद्दालाई लिएर अमेरिकाको छवि विश्वव्यापीरूपमा लगातार बिग्रँदै गएको देखिएको छ ।
प्यू रिसर्चले २४ देशमा गरेको सर्वेक्षणमा आठ देशको दृष्टिकोण अमेरिकाप्रति राम्रो रहेको देखिएको छ । सात देशको नजरमा चीन धेरै राम्रो सहयोगी देश हो । दुई देशले दुवै देशलाई बराबरमा राखे । यद्यपि, सर्वेक्षणले विश्वव्यापी दृष्टिकोणमा परिवर्तनको कारण खुलाएको छैन ।
रिसर्चकी एसोसिएट डाइरेक्टर लौरा सिल्भरले अमेरिकालाई अब विश्वका देशहरूले कम भरपर्दो सहयोगी देश मान्न थालेको र विश्वका देशहरूको अमेरिकाप्रतिको विश्वास पनि घटेको बताइन् ।
चीनको सरकार मानव अधिकारसम्बन्धी नीति र महामारीसँग जुध्ने तरिकालाई लिएर विश्वव्यापीरूपमा निसानामा परेको छ । अमेरिकामा डेमोक्रेटिक सिनेटरको एक समूहले पनि यो हप्ता ट्रम्प प्रशासनमाथि विदेशी सहायता कार्यक्रम बन्द गरेर, सहयोगी देशहरूमाथि ट्यारिफ लगाएर, विदेशी विद्यार्थीमाथि भिसा प्रतिबन्ध लगाएर र प्रतिष्ठित विश्वविद्यालयमाथि नियन्त्रण गरेर ट्रम्प प्रशासनले अमेरिकाको विश्वव्यापी प्रभावलाई ठूलो क्षति पुर्याइरहेको आरोप लगाएका थिए ।
अब प्यू रिसर्चको सर्वेक्षणले पनि यसको पुष्टि गरेको छ । प्यू रिसर्चको सर्वेक्षणमा उच्च आय भएका देशहरू (क्यानडा, फ्रान्स, जर्मनी र इटाली आदि)का ३५ प्रतिशत मानिस अमेरिकाप्रति सकारात्मक राय राख्छन्, जबकि यो आँकडा गत वर्ष ५१ प्रतिशत थियो ।
उच्च आय भएका पश्चिमी देशहरू जो अहिलेसम्म अमेरिकाका नजिकका मित्र थिए । त्यहाँ पनि चीनको स्वीकार्यता बढेको र अब धनी देशहरूका ३२ प्रतिशत मानिस चीनप्रति सकारात्मक सोच्छन् ।
यो गत वर्षको आँकडा २३ प्रतिशत थियो । इजरायलका मानिसहरू अझै पनि अमेरिकाप्रति सकारात्मक छन् र ८३ प्रतिशत इजरायलीले अमेरिकालाई मन पराउँछन् । यता चीनप्रति सकारात्मक सोच राख्ने मानिसहरू पनि ३३ प्रतिशत छन् । तिनमा ६९ प्रतिशत मानिसहरू ट्रम्पलाई मन पराउँछन् । जबकि, ९ प्रतिशत मानिसहरूले मात्र सी चीनफिङलाई राम्रो मान्छन् ।
प्यूले ८ जनवरीदेखि २६ अप्रिलसम्म २५ देशका ३० हजारभन्दा बढी मानिसहरूको सर्वेक्षण गरेको थियो । प्रत्येक देशका लागि त्रुटिको मार्जिन प्लस वा माइनस २.५ देखि प्लस वा माइनस ४.७ सम्म थियो ।
