हरि आचार्य, कपिलवस्तु
हिलबर्ट इङ्गलिस बोर्डिङ्ग स्कुल बाणगंगा नगरपालिका २ पिपरा कपिलवस्तुमा शैक्षिक गुणस्तर अभिवृद्धिका लागि अभिभावकहरूलाई लक्षित गरी कुशल अभिभावकीय कला अभिप्रेरणात्मक कार्यक्रम सम्पन्न भएको छ । साना नानीबाबुहरूलाई पहिलो पाठशाला घरबाटै असल संस्कार ,शिक्षा ,ज्ञान, शिष्टाचार,मर्यादा जस्ता आदि कुराहरुलाई मध्यनजर गर्दै उनीहरूमा असल र आदर्श जस्ता व्यवहारहरू सिकाउनुमा अभिभावकहरुको महत्त्वपूर्ण भूमिका र जिम्मेवारी हुने कुरा औल्याइएको छ । उक्त कार्यक्रम विभिन्न कक्षा र तहगत रूपमा चरणबद्ध तरिकाले सञ्चालन हुँदै आइरहेको छ ।
मङ्सिर १० गते बुधबारका दिन कक्षा २ देखि कक्षा ७ सम्म अध्ययन गर्ने विद्यार्थीहरूका अभिभावकहरूको उपस्थिति रहेको थियो । उक्त कार्यक्रम विद्यालय व्यवस्थापन समितिका अध्यक्ष श्री दीपक खनालको अध्यक्षता, बाणगंगा नगरपालिकाका निवर्तमान शिक्षा शाखा प्रमुख खिमबहादुर जिसीको प्रमुख आतिथ्यता, राष्ट्रिय एवं अन्तर्राष्ट्रिय स्तरमै आफ्नो छुट्टै ख्याति कमाउन सफल अन्तर्राष्ट्रिय उत्प्रेरक मोटिभेस्नल स्पीकर बि .के. शर्माको विशिष्ठ आतिथ्यता, विद्यालयका प्रबन्ध निर्देशक बुद्धि पौडेल र विद्यालयका प्राचार्य शिवकुमार पोखरेल आतिथ्यतामा सम्पन्न भएको उक्त कार्यक्रममा विद्यालय व्यवस्थापन समितिका अध्यक्ष तथा कार्यक्रमकामा अध्यक्षताको आसन ग्रहण गर्नुभएका दीपक खनालको स्वागत मन्तव्य रहेको थियो ।
यसैगरी आफ्नो आसनबाट बोल्दै विद्यालयका प्राचार्य शिवकुमार पोखरेलले यस्ता किसिमका कार्यक्रम विद्यार्थी, अभिभावक ,विद्यालय तथा शिक्षक सबैका लागि अत्यन्तै महत्वपूर्ण लाभदायी र उपलब्धि मुलक रहेने बताउनुभएको थियो । तीन दिनदेखि निरन्तर रुपले कक्षा पिजीदेखि कक्षा १० सम्म सञ्चालन भएको उक्त कार्यक्रम समापन भएको छ । उक्त कार्यक्रम विद्यालयका एकेडेमिक डाइरेक्टर तेज प्रसाद आचार्यले सञ्चालन गर्नुभएको थियो ।
