लुदअ माघ १९, काठमाण्डौ
नेपाली कांग्रेसका नेता डा. मिनेन्द्र रिजालले वर्तमान सत्ता गठबन्धनसँग जीवनभर मिलेर चुनाव लड्छौँ भनेर कागजपत्र नगरेको बताउनुभएको छ । तत्कालीन प्रधानमन्त्री केपी शर्मा ओलीले प्रतिनिधि सभा विघटन गरी संविधान ट्र्याक बाहिर गएको भन्दै संविधानलाई ट्र्याकमा ल्याउनका लागि मात्रै गठबन्धन गरिएको उहाँको भनाइ छ ।
आज बुधवार राष्ट्रिय युवा सङ्घ नेपालले काठमाण्डौमा आयोजना गरेको ‘स्थानीय तह चुनाव, संवैधानिक व्यवस्था र अबको राजनीति’ विषयक खुला बहसमा बोल्दै उहाँले भन्नुभयो, ‘केपी ओली नेतृत्वको सरकारले जसरी शासन गर्दै थियो, जसरी पटक–पटक प्रतिनिधि सभा विघटन गर्यो, त्यसबाट संविधान जोगाउन गाह्रो हुन्छ भनेर हामीहरू हिँडेको हो । हामीहरूले त्यतिखेर अब बाँकी जीवनभर चुनाव सँगै लड्छौँ भनेर कागज गरेका छैनौँ । हामीले संविधान ट्र्याक भन्दा बाहिर गयो, त्यसलाई ट्र्याकमा ल्याउने र त्यसका लागि सँगै बस्ने भएको हो ।’
कार्यक्रममा बोल्दै नेता रिजालले एमालेले निरन्तर संसद अवरोध गरिरहनु बेठिक भएको बताउनुभयो । सभामुखको भूमिका चित्त नबुझेमा हटाउने कानुनी व्यवस्था संविधानले दिएको भए पनि एमालेले त्यसो गर्न नसकेको नेता रिजालले बताउनुभयो । संसद्को गतिरोध अन्त्य गरेर निकास दिनुपर्नेमा उहाँले जोड दिनुभयो ।
नेता रिजालले भन्नुभयो, ‘तपाईँहरू९एमाले० ले संसद् बन्द गरेर संविधानलाई तागत दिइरहनुभएको छैन । तपाईँहरूलाई सभामुखको भूमिका चित्त बुझेन भने सभामुख बेठिक छन्, यिनलाई हटाइ पाउँ भनी लेख्ने व्यवस्था त संविधानले दिएको छ नि । त्यो व्यवस्थामा जानुभएको भए हुन्थ्यो नि त । जानुभएन अहिलेसम्म । त्यो व्यवस्थामा तपाईँहरूसँग मत नपुग्ला तर लोकतन्त्र भनेको जित, हार दुई वटै हुन्छ नि त । जित्दा मात्र मान्छु हार्दा मान्दिनँ भन्न पाइँदैनँ नि त । निकास खोज्नुपर्ला नि त ।’
