हरि आचार्य, कपिलवस्तु
कपिलवस्तुको बाणगंगा नगरपालिकाको प्रमुख प्रशासकीय अधिकृतको रुपमा आउनुभएका खिमानन्द भुसालले पदभार ग्रहण गर्नुभएको छ । यस अघि गुल्मीको मुसीकोट नगरपालिकाको प्रमुख प्रशासकीय अधिकृतको रुपमा कार्यरत भुसाल नेपाल सरकारका उप–सचिव हुनुहुन्छ । उहाँसंग यस अघि विकट जुम्लाको हिमा गाउँपालिका, गुल्मीको मुसीकोट नगरपालिका, अर्घाखाँचीको छत्रदेव गाउँपालिकामा कुशलता पुर्वक कार्यकारीको रुपमा कार्य गरेको अनुभव छ भने संघीय सरकारका विभिन्न मन्त्रालयमा पनि कार्य गरेको अनुभव रहेको छ ।
पदभार ग्रहण गर्दै प्रमुख प्रशासकीय अधिकृत भुसालले ऐन कानुनको परिधिभित्र रहेर जनप्रतिनिधि सहित सरोकारवाला सबैसंग सहकार्य गर्दै बाणगंगालाई सुशासन, पारदर्शिता र जवाफदेहीतामैत्री नगरपालिकाको रुपमा पहिचान दिलाउने बताउनुभयो । उहाँले सेवाग्राहीमैत्री नगरको विकासका लागि आफ्नो सदैव पहल रहने बताउदै यसका लागि नगरवासी सबैले साथ दिनेमा विश्वस्त रहेको बताउनुभयो । जुनसुकै कार्य गर्दा पनि परिणाममुखी हुनुपर्नेमा जोड दिंदै नगरको विकास र नगरवासीको काम सहज रुपमा हुनुनै आफ्नो मुख्य लक्ष्य रहेको बताउनुभयो ।
नगर प्रमुख चक्रपाणि अर्याल सहित जनप्रतिनिधि र कर्मचारीहरुद्धारा प्रमुख प्रशासकीय अधिकृत भुसाललाई भव्य स्वागत गरिएको थियो ।
स्वागत कार्यक्रममा बोल्दै नगरप्रमुख चक्रपाणि अर्यालले कर्मचारी संयन्त्रलाई विश्वासिलो र जनउत्तरदायी बनाउन भुमिका खेल्ने विश्वास व्यक्त गर्र्नुभयो । उहाँले जनप्रतिनिधिहरु पाँच वर्षमा आउने जाने भए पनि कर्मचारी संयन्त्र स्थायी सरकार भएको बताउदै जनप्रतिनिधि सफल हुनु नहुनुमा कर्मचारी संयन्त्रको अहम भूमिका रहने बताउनुभयो ।
