हरि आचार्य कपिलवस्तु, चैत २०

ईलाका प्रहरी कार्यालय पिपरा कपिलवस्तुको हिरासत कक्षमा रहेका एक जनाले आत्महत्या गरेका छन् । आफ्नै १७ वर्षीया छोरीलाई वलात्कार गरेको आरोपमा वाणगंगा नगरपालीका वडा नं ८ बाट प्रकाउ परेका ३८ बर्षिय एक आरोपीतले आत्महत्या गरेका हुन् । बिहिवार इलाका प्रहरी कार्यालय पिपराको हिरासत भित्र रहेको अटैच वाथरुम सहितको शौचालयको भेन्टीलेसनमा तन्नाको पासो लगाएर आत्म हत्या गरेको इलाका प्रहरी कार्यालय पिपराका प्रहरी निरिक्षक आयुष प्रसाद जोसिले जानकारी दिएका छन् ।

प्रहरी हिरासतको एउटै कोठामा रहेका ५ जना मध्येका एक जना वन्दी शौचालय गएको र अर्को ब्यक्ति शौचालय जान थाल्दा पहिले गएकोे ब्यक्ति लामो समय सम्म ननिस्किए पछि भेन्टीलेसनवाट हेर्दा झुन्डीएको देखे पछि थुनुवाले प्रहरीलाई जानकारी गराएका थिए । ईलाका प्रहरी कार्यालयको हिरासतमा घटना भएकोले सो घटनाको चेकजाँच र अनुसन्धान गर्न जिल्ला प्रहरी कार्यालय तौलीहवाबाट प्रहरी उपरिक्षक सुनिल मल्लको नेतृत्वमा टोली आई स्थानीय जनप्रतिनिधि, मानवअधिकार कर्मी, संचारकर्मी, स्थानीय बुद्धिजिविहरु र मृतकका आफन्तहरु समेतको रोहवरमा दिउँसो शवको पोष्टमार्टमका लागी जिल्ला अस्पताल तौलिहवा पठाइएको छ ।

अभियुक्तलाई आफ्नै छोरीलाई बलात्कार गरेको आरोपमा फागुन १८ गते इलाका प्रहरी कार्यालयले गिरफ्तार गरी हिरासतमा राखेको थियो । कोरोनाका कारण लकडाउन संगै अदालत बन्द भएका कारण उनी हिरासतमै रहेका थिए । घटना पछि बुटवल बसोवास गर्दै आएका मृतकका बाबु आमाले छोराको प्रहरी हिरासतमा नियोजित तरिकाले हत्या भएको भन्दै छानविनको माग गरेका छन् । घट्ना अनुसार झुण्डिएको मान्छेले भुइमा टेकेको भएकोले हत्या भएको हुन सक्ने भन्दै आफन्तले आशंका व्यक्त गरेका थिए ।