लुदअ कपिलवस्तु, पुस ६
नेपाल कम्युनिस्ट पार्टी (नेकपा) स्थायी कमिटी सदस्य वर्षमान पुनले आधिकारिक नेकपा प्रचण्ड र नेपालसमूहले नेतृत्व गरेको पार्टी नै रहेको दाबी गरेका छन् । नेकपामा प्रचण्ड र नेपालसमूहले नेतृत्व गरेको पार्टीसंगै नै बहुमत रहेको भन्दै आफुहरु नै आधिकारिक रहेको बताएका हुन् । नेकपा प्रचण्ड–नेपाल पक्षका कार्यकर्ता भेलालाई कपिलवस्तुमा सम्बोधन गर्दै पुनले कपिलवस्तुका आम कार्यकर्तालाई भ्रममा नपर्न आग्रह गरेका छन् । पूर्व मन्त्री समेत रहेका पुनले प्रधानमन्त्री केपी ओलीलाई गणतन्त्र मन नपरेका कारण अर्कै बाटो हिँड्न खोजेको बताए ।
कपिलवस्तुमा सम्बोधन गर्दै उनले २०६२र०६३ को जनआन्दोलन उत्कर्षमा पुग्दै गर्दा ओलीले नेपालमा राजतन्त्रको अन्त्य र गणतन्त्र स्थापना सम्भव नभएको अभिव्यक्ति दिएको समेत स्मरण गरे । उनले भने, ‘हामीले उहाँको विचारमा परिवर्तन आयो होला भन्ने विश्वास ग¥यौं, तर उहाँ बयलगाडाकै मनोविज्ञानमा हुनुहुँदो रहेछ ।’
अहिले आफुहरु दोस्रो चरणको आन्दोलनमा रहेको र आगामी दिनमा ओलीविरुद्ध सशक्त रुपमा प्रस्तुत हुने उनको भनाई छ ।
“अमेरिका जस्तो शक्तिशाली राष्ट्रमा त अमेरिकी राष्ट्रपति डोनाल्ड ट्रम्पले आफ्नो कार्यकालमा दुई पटकसम्म महाअभियोगको सामाना गरे तर हाम्रा प्रधानमन्त्री ओलीमा तेस्तो क्षमता त्यो साहस छैन्” उनले भने ।
पुनले बहुमत प्राप्त दलको नेताले चाहँदैमा संसद् विघटन हुने व्यवस्था संविधानको कुनै उपधारामा नरहेको हेक्का राख्न ओलीलाई सुझाव दिए । ओलीलाई पार्टी अध्यक्षबाट निकालि सकिएको र अब पार्टीको साधरण सदस्यबाट पनि किन ननिकाल्ने भनि पार्टीले स्पष्टिकरण सोधिसकेको उनले बताए ।
त्यस्तै सम्बोधन गर्दै पूर्व सभामुख ओनसरी घर्तीले राम बहादुर थापा बादल, मणि थापा, टोप बहादुर रायमाझी र गिरीधारीलाल न्यौपानेलाई केपी शर्मा ओलीको नयाँ दास रहेको बताईन् । उनले ओली फाँसीबादी चरित्रको भएको र फाँसीबादीहरुसंग कि त दास हुन्छन् कि त शत्रु हुने उनको भनाई छ ।
