असार १
गण्डकी र लुम्बिनी प्रदेशमा अहिले भारी वर्षा भइरहेको छ । जसका कारण गण्डकी र लुम्बिनीका विभिन्न जिल्ला भएर बग्ने ठूला नदीहरुमा बाढी आएको छ । जल तथा मौसम विज्ञान विभागको बाढी पूर्वानुमान महाशाखाका अनुसार नारायणी, गण्डकी, त्रिशूली र तिनाउ नदीमा बाढी आएको छ । अर्घाखाँची, नवलपरासी, पाल्पा, क्षेत्रमा बढी पानी पर्दा नारायणी, गण्डकी, तिनाउ लगायतका ठूला नदीहरुमा जल सतह बढेको छ । लगातारको वर्षाका कारण नारायणी नदीमा पानीको सतहले चेतावनीको तह पार गरेको छ । जल तथा मौसम विज्ञान विभागका अनुसार नारायणी नदीमा पानीको सतह ७.३ भन्दा माथि नाघेर ७.८ मिटर पुगेको छ । गएको जेठ २८ गते मनसुन भित्रिएसँगै देशभर लगातारजसो पानी परिरहेको छ । अबिरल बर्षाका कारण घर भत्किदा गुल्मीको ईस्मा गाउँपालीका ५ रजस्थल मैदानकी जानुका परियार घाईते हुनुभएको छ । ईस्मा ५ का परियारको निर्माणधीन अवस्थामा रहेको घर भत्किँदा जानुकालाई पुरिएको अवस्थामा फेला पारिएको जिल्ला प्रहरी कार्यालय गुल्मीका सुचना अधिकारी पुरूषोत्तम प्रसाद पाण्डेले जानकारी दिए । घाईतेको अवस्था गम्भीर रहेको प्रहरीले जनाएको छ । यसैबीच मौसम पूर्वानुमान महाशाखाले आज दिउँसो मनसुन बुलेटिन निकालेर अहिले मनसुन थप सक्रिय भएकाले देशका केही ठाउँमा ठूलो पानी पर्ने जनाएको छ । महाशाखाले अहिले भारतको झारखन्डमा रहेको न्यून चापीय क्षेत्र र मनसुनी न्यून चापीय रेखाको प्रभावका कारण मनसुन थप सक्रिय भएको जनाएको हो । आज दिउँसो र राति देशका धेरै ठाउँमा हल्कादेखि मध्यम खालको पानी पर्ने र गण्डकी, लुम्बिनी र वाग्मती प्रदेशको केही ठाउँमा भने ठूलो पानी पर्ने महाशाखाले जनाएको छ । यी प्रदेशका पहाडी ठाउँमा पहिरोको जोखिम रहेको, नदीनाला तथा खहरे खोलामा पानीको सतह बढ्न सक्ने हुँदा आवश्यक सतर्कता अपनाउन महाशाखाले आग्रह गरेको छ । मौसमविद्ले अबको तीन दिन लगातार पानी पर्ने पूर्वानुमान गरेका छन् ।